baydin qatargha «nato ezasi bolmighan muhim ittipaqdash» salahiyiti bérishni telep qildi

türkiye awazi radiyosi xewiri: amérika pirézidénti jo baydin washingtonda qatar emiri sheyx temim bin hamed alsani bilen körüshüshtin ilgiri muxbirlarning soallirigha jawab berdi.

u qatar bilen amérika otturisida 50 yilliq shériklik munasiwetning barliqini eskertip, qatarning bir qanche on ming afghanistanliqqa sahibxanliq qilghanliqini, ghezze bilen pelestin mesilisidimu muhim rollarni oynighanliqini qeyt qildi.

u qatar hawa yolliri shirkiti bilen boyin shirkiti otturisida tüzülgen 20 milyard dollarliq kélishimni memnunluq bilen qarshi alidighanliqlirini tekitlep, buning boyinning eng chong kélishimliridin biri ikenlikini bildürdi.

u mundaq dédi:

«qatar yaxshi dost we ishenchlik shérik dölet. qatarni nato ezasi bolmighan muhim ittipaqdash süpitide étirap qilish pilani mesiliside kongrege melumat bérimen. bu munasiwetlirimizning qanchilik muhim ikenlikining bir körsetküchi we shundaq qilishning waqti keldi, hetta ötüp ketti.»

amérika bügüngiche «nato ezasi bolmighan muhim ittipaqdash» dep étirap qilghan 18 dölet bar.

amérikada 1987-yili maqullanghan bir qanun layihesi bilen, pirézidént ronald régan (Ronald Reagan) awstiraliye, misir, isirailiye, yaponiye we jenubiy koréyeni mezkur katégoriyege kirgüzgen idi.

pars qoltuqidiki behreyn bilen küweyt sabiq pirézidént jorj wolkér bush (George W. Bush) teripidin bu katégoriyege kirgüzülgen idi.