ши җинпиң оттура асийадики 5 дөләт рәһбәрлири билән тор йиғини чақирди

хитай пирезиденти ши җинпиң оттура асийадики 5 дөләт рәһбәрлири билән торда өткүзүлгән башлиқлар йиғиниға саһибханлиқ қилди.

1768750
ши җинпиң оттура асийадики 5 дөләт рәһбәрлири билән тор йиғини чақирди

түркийә авази радийоси хәвири: хитай билән оттура асийа дөләтлири оттурисида дипломатик мунасивәт орнитилғанлиқиниң 30 – йиллиқи мунасивити билән өткүзүлгән башлиқлар йиғиниға қазақистан пирезиденти қасим җомәрт тоқайев, қирғизистан президенти садир җапаров, таҗикистан президенти имамәли рахман, өзбекистан пирезиденти шәвкәт мирзийойев вә түркмәнистан пирезиденти қурбангули бәрдимоһәммәдов қатнашти.

ши җинпиң хитай вә оттура асийа дөләтлириниң йеқинқи 30 йилда хәлқаралиқ мунасивәтләрдә үлгә болидиған йахши мунасивәтләрни тәрәққий қилдурғанлиқини билдүрүп,  бу мувәппәқийәтниң сириниң өз-ара һөрмәт, йахши қошнидарчилиқ, қийин вақитларда һәмкарлишиш вә өз-ара мәнпәәт йәткүзүшни асас қилидиғанлиқини ейтти.

ши җинпиң хитайниң районниң муқимлиқи вә тәрәққийатини қоллайдиғанлиқини тәкитләп, «хитайниң қанчилик чоңийишидин йаки хәлқара шараитниң қанчилик өзгиришидин қәтий нәзәр, хитай оттура асийа дөләтлири ишинидиған йахши қошна, шерик вә қериндаш дөләт болушни давамлаштуриду» деди.

хитайниң оттура асийа дөләтлири билән болған мунасивәтлирини техиму тәрәққий қилдурушни вә бирликтә ортақ бир кәлгүси бәрпа қилишни халайдиғанлиқини билдүргән ши җинпиң  ковид-19 ваксиниси, дора вә йуқумдин мудапиәлиниш материйаллири билән тәминләштә райондики дөләтләргә йардәм беришкә вәдә қилди.

ши бу йил оттура асийа дөләтлиригә 50 милйон ваксина йардәм қилидиғанлиқини тәкитләп, буниңдин башқа йәнә райондики дөләтләргә бу саһә бойичә техника вә илим -пән йөткәшниму нишан қилидиғанлиқини оттуриға қойди.

ши җинпиң хитай билән оттура асийа дөләтлири оттурисидики содиниң мустәқил болғандин кейинки 30 йилда 100 һәссә ашқанлиқини, бейҗиң даирилириниң райондики дөләтләргә салған биваситә мәблиғиниң 14 милйард долларға йәткәнликини әскәртти.

хитайниң 2013-йили қазақистанда өткүзүлгән бир йиғинда тунҗи қетим оттуриға қойған бир бәлвағ бир йол тәшәббуси даирисидики лайиһәлириниң хитай билән оттура асийа дөләтлири оттурисидики иқтисадий мунасивәтни тәрәққий қилдурушниң ачқучи икәнликини тәкитлигән ши җинпиң, хитайниң чоң базирини оттура асийа мәһсулатлири үчүн ечишқа тәййар икәнликини вә икки тәрәплик содини 2030-йилға барғанда 70 милйард долларға йәткүзүшни нишан қилғанлиқини билдүрди.



مۇناسىۋەتلىك خەۋەرلەر