iran, rusiye we xitay üchinchi qétim birlikte manéwir ötküzdi

türkiye awazi radiyosi xewiri: iran irna (IRNA) agéntliqining xewiride bildürülishiche, «2022-yilliq déngiz xewpsizlik kemeri» namliq manéwir, «birlikte tinchliq we bixeterlik üchün» shoari astida hindi okyanning shimalida kölimi 17 ming kwadrat kilométirliq jayda ötküzülmekte iken.

iran déngiz armiyesi we inqilabiy muhapizetchiler qismining herbiy paraxotliri, hawa qisimliri qatnashqan manéwirgha, rusiye bilen xitay herbiy paraxotliri hemde arqa sep paraxotliri bilen ishtirak qildi.

manéwirning bayanatchisi mustafa tajeddini babul mendeb, malakka we hürmüz boghuzi qatarliq muhim su yollirigha tutishidighanliqi sewebidin hindi okyanning shimalining intayin muhim ikenlikini eskertip: «bu manéwir altun üch burjek dep atilidighan we dunya sodisi üchün hayatiy ehmiyetke ige mezkur rayonda, üch döletning menpeetlirini qoghdash we dawamlashturghili bolidighan déngiz xewpsizlikini kapaletke ige qilish üchün ortaq tirishchanliq hésablinidu» dédi.

u manéwirda ot ketken bir paraxotni qutquzush, görüge éliwélinghan bir paraxotni qutquzush, belgilengen nishanlargha we kéchide hawadiki nishanlargha oq étish qatarliq oxshimighan taktikiliq herbiy heriketlerning qilinidighanliqini bildürüp, xelqara déngiz sodisining bixeterlikini kücheytish, déngiz térrorizmi we déngiz qaraqchiliqigha qarshi küresh, izdesh-qutquzush jaylirida uchur almashturush we taktikiliq herbiy heriketlerde tejribe almashturush qatarliq mesililerning, manéwirning muhim meqsetliridin biri ikenlikini qeyt qildi.

iran, rusiye we xitay «2022-yilliq déngiz xewpsizlik kemeri» namida, üchinchi qétim manéwir ötküzgen boldi. birinchi qétimliq manéwir 2019-yili dékabirda ötküzülgen idi.