péskow erdoghanning teklipi üstide toxtaldi
türkiye jumhur reisi rejep tayyip erdoghanning rusiye bilen ukraina otturisidiki mesililerni hel qilish üchün, rusiye pirézidénti putin we ukraina pirézidénti zélénskini türkiyege teklip qilishi, rusiyede memnunluq yaratti.
türkiye awazi radiyosi xewiri: rusiye krémil sariyi bayanatchisi dmitriy péskow muxbirlarning rusiye bilen ukraina otturisidiki jiddiychilikning axirlishishi üchün, rejep tayyip erdoghanning putin we zélénskini türkiyege teklip qilghanliqi toghrisidiki soalgha jawab berdi.
u rusiye bilen ukraina otturisidiki asasiy ixtilaplarning, kiyéwning minsk kélishimlirini ijra qilishni toxtitishigha munasiwetlik ikenlikini eskertip: «ukrainadiki mesililerni hel qilishqa yardem qilidighan her qandaq bir döletning tirishchanliqlirini qizghin qarshi alimiz» dédi.
u ukrainadiki weziyetning nahayiti keskin ikenlikini tekitlep, ukrainagha qoral-yaragh toshuluwatqanliqini, herbiy heriketlerning qiliniwatqanliqini we nato bilen gherbiy yawropa döletliri ayropilanlirining ukraina asminida uchuwatqanliqini qeyt qildi.
u: «barliq bular ukraina etrapida jiddiychilikke seweb bolmaqta» dédi.
türkiye jumhur reislik mehkimisi bayanatchisi ibrahim kalin rejep tayyip erdoghanning rusiye-ukraina otturisidiki mesililerni hel qilish üchün, hem putin hemde zélénski bilen körüshkenlikini bildürüp: «rejep tayyip erdoghan hetta xalisa her ikki rehberni türkiyege kélishke, otturidiki mesililerni we oxshimasliqlarni hel qilish üchün yighin uyushturushqa teklip qildi. türkiye, rusiye-ukraina otturisidiki jiddiychilikni peseytish üchün her türlük rolni oynashqa teyyar. buni hem rusiye hemde ukrainaning dosti, shundaqla nato ittipaqdishi bolush süpitimiz bilen qiliwatimiz» dégen idi.
