nato tashqi ishlar ministirliri yighini chaqirilidu
7 – yanwar küni shimaliy atlantik ehdi teshkilati tashqi ishlar ministirlirining pewquladde yighini chaqirilidu.
türkiye awazi radiyosi xewiri: shimaliy atlantik ehdi teshkilati teripidin élan qilinghan bayanatta bildürülüshiche, nato tashqi ishlar ministirlirining 7 – yanwar jüme küni chaqirilidighan sinliq pewquladde yighinida, rusiyening yéqindin buyanqi ukraina chégrasida qoshun orunlashturushidin kéyin otturigha chiqqan xelqaraliq sürkilishtin sirt yene, téximu keng dairide yawropaning bixeterliki mesilisi toghruluq muzakire élip bérilidiken.
yighindin kéyin, shimaliy atlantik ehdi teshkilati bash katipi stolténbérgning, muxbirlargha melumat bérishi kütülmekte iken.
shimaliy atlantik ehdi teshkilati tashqi ishlar ministirliri yighini, 10 – yanwar küni amérika qoshma ishtatliri bilen rusiye otturisida shiwéytsariyening jenwe shehiride ishqa ashurulidighan uchrishish harpisida chaqirilishi nahayiti zor ehmiyetke ige iken.
buningdin bashqa yene, aridin uzun waqit ötkendin kéyin, 12 – yanwar küni nato - rusiye kéngishi yighini ötküzülidiken, bu yighin, ikki terep otturisida alaqe ornitilishida türtkilik rol oynaydiken.
bu ikki yighindin bashqa, 13 – yanwar küni, rusiye, ukraina, amérika qoshma ishtatliri we yawropa döletlirining ishtirak qilishida yawropa bixeterlik we hemkarliq teshkilati yighini chaqirilishi pilanlanmaqta iken.
shimaliy atlantik ehdi teshkilatining 30 – noyabir küni latwiyening paytexti rigada chaqirilghan axirqi qétimliq tashqi ishlar ministirliri yighinida, noyabirdin buyan rusiyege bériliwatqan agahlandurush tekrarlanghanidi.
shimaliy atlantik ehdi teshkilati bash katipi stolténbérg, rusiyening ukrainagha qaratqan herqandaq shekildiki tajawuzchiliqining éghir bedilining, siyasiy we iqtisadiy aqiwetler bolidighanliqini bildürüp, shimaliy atlantik ehdi teshkilatigha eza döletlerning rusiyege iqtisadiy we pul-muamile émbargoliri we siyasiy cheklimilerni yolgha qoyidighanliqini éyttqanidi.
rusiye bolsa, shimaliy atlantik ehdi teshkilati bilen amérika qoshma ishtatlirigha bixeterlik kapaliti toghrisida kélishim tüzüsh teklipi sunghan, shundaqla, ukrainaning kelgüside shimaliy atlantik ehdi teshkilati ezaliqigha kapaletlik qilinishinimu öz ichige alghan tekliplerni otturigha qoyghanidi.
