antoni blinkén bilen josép borrél xitayning bésim siyasitini muzakirileshti
amérika tashqi ishlar ministiri antoni j. blinkén bilen yawropa ittipaqi tashqi munasiwet we bixeterlik siyasiti aliy wekili josép borrél rusiyening ukraina chégrasida esker toplishi we xitayning litwaniyege qaratqan siyasi bésimini muzakire qildi.
türkiye awazi radiyosi xewiri: amérika tashqi ishlar ministirliqi bayanatchisi néd prays blinkén bilen borrélning téléfonda söhbetleshkenlikini bildürüp: «tashqi ishlar ministiri we aliy wekil amérika-yawropa hemkarliqini kücheytish hemde ortaq xirislargha taqabil turush üchün birlikte xizmet qilishni dawamlashturidighanliqlirini yene bir qétim tekitlidi» dédi.
néd prays ikki mesulning ukrainaning igilik hoquqi we zémin pütünlükini qollash üchün masliship xizmet qilishining muhimliqini eskertip: «ukrainagha qaritilghan her qandaq herbiy hujumining rusiye fédératsiyesige nisbeten éghir aqiwetlerni élip kélidighanliqini qayta tekitlidi. buningdin bashqa yene, xitay xelq jumhuriyitining litwaniyege qaratqan siyasiy we iqtisadiy bésimining amérika we yawropa shirketlirige tesir körsetken halda künséri küchiyiwatqanliqigha bolghan endishilirini otturigha qoydi» dédi.
néd prays bayanatida: «blinkén bilen borrél xitayning zulum qilmishlirigha qarshi litwaniye bilen dawamliq hemkarlishidighanliqini tekitlep, iqtisadning berdashliq bérish iqtidarini kücheytish üchün ortaq xizmetlerni qilishqa ehdileshti» dédi.
