مېكسىكادا مەخپىي مازاردىن 7 جەسەت تېپىلدى

تۈركىيە ئاۋازى رادىيوسى خەۋىرى: مېكسىكا تاراتقۇلىرىنىڭ خەۋەر قىلىشىچە، نوۋو لېئون ئىشتاتىغا قاراشلىق سالىناس ۋىكتورىيە يېزىسىدا، يەتكۈزۈلگەن ئۇچۇرغا ئاساسەن ئېنىقلاپ چىقىلغان بىر مەخپىي مازارنى تەكشۈرۈش جەريانىدا كۆپ ساندا جەسەت تېپىلغان.

ئالاقىدار تارماقلارنىڭ بىلدۈرۈشىچە، تەپتىش مەھكىمىسى ۋە ساقچىلارنىڭ ھەمراھلىقىدا مازاردىن چىقىرىلغان جەسەتلەرنىڭ سانى 7 ئىكەن.

ئىشتاتلىق باش تەپتىش مەھكىمىسىنىڭ بىلدۈرۈشىچە، رايوندا تېخىمۇ كۆپ جەسەتنىڭ بار بولۇش ئېھتىماللىقى يۇقىرى بولۇپ، تەكشۈرۈش پائالىيەتلىرى داۋاملاشماقتا ئىكەن.

«قۇربانلار شايكىلار ئوتتۇرىسىدىكى ھېسابلىشىش نەتىجىسىدە ئۆلتۈرۈلگەن» دەپ قارالماقتا ئىكەن.

مېكسىكادىكى يوقاپ كەتكەنلەرنى ئىزدەش كومىتېتىنىڭ دوكلاتلىرىغا قارىغاندا، بۇ دۆلەتتە يوقاپ كەتكەن 94 مىڭ 500 ئادەمدىن ھېچقانداق خەۋەر يوق ئىكەن.