amérika söhbet netijisiz bolghanda, bashqa tedbirlerni qollinishqa teyyar ikenlikini bildürdi

türkiye awazi radiyosi xewiri: amérika dölet mudapie ministiri lloyd ostin awstiriye paytexti wiyénnada iran yadro söhbetliri dawamlishiwatqan bir peytte, isirailiye dölet mudapie ministiri bénny gantz (Benny Gantz) bilen besh burjeklik binada körüshti.

u körüshüshtin burun muxbirlarning ziyaritini qobul qilip: «isirailiyening iran hökümitining térroizmgha qiliwatqan yardimi, bashqurulidighan bomba pirogrammiliri we kishini endishege salidighan yadro paaliyetlirini öz ichige alghan weziyetni muqimsizlashturidighan heriketliridin hés qiliwatqan chongqur qayghulirimizni ortaqlishimiz» dédi.

u amérika bilen isirailiyening, iranning yadro qoralgha ige bolushining aldini élishta «pütünley oxshash pikirde» ikenliklirini bildürüp, sözini mundaq dawamlashturdi:

«bu amérika we isirailiye, shundaqla dunyaning milliy xewpsizik menpeetidur. iran hökümitining yéqinqi aylardiki yadro paaliyetliridin, hem dawamlishiwatqan ighwagerchilikliridin hemde ijabiy diplomatik pirinsip kemchillikliridin chongqur endishe hés qilimen. pirézidént jo baydinning éniq ipade bildürginidek, söhbet muweppeqiyetsiz bolghan ehwalda bashqa tedbirlerni qollinishqa teyyarmiz. dölet mudapie ministirliqi iran tehditlirige qarshi isirailiyeni asas qilghan halda rayondiki barliq shériklirimiz bilen dawamliq türde yéqindin hemkarlishidu. özimizni, dostlirimizni we menpeetlirimizni qoghdaymiz.»

isirailiye dölet mudapie ministiri gantz: «irangha qarshi turush üchün ortaq herbiy teyyarliq we iranning rayondiki urushqaqliqini, yadro arzusini toxtitishni öz ichige alghan témilardiki diyalogimizni we özara hemkarliqlirimizni chongqurlashturushni töt köz bilen kütüwatimiz. iranning dunya we rayon tinchliqi, muqimliqi üchün eng chong tehdit ikenlikini éytalaymen» dédi.

gantz iranning isirailiye döliti üchün mewjutluq tehditi ikenlikini ilgiri sürdi.