نىگېرىيەدە يولۇچىلار پاراخوتى قازاسىدا قازا قىلغانلار سانى كۆپەيدى
نىگېرىيەنىڭ كانو ئۆلكىسىدە 30 – نويابىر كۈنى يولۇچىلار پاراخوتىنىڭ ئۆرۈلۈپ كېتىشى نەتىجىسىدە ھاياتىدىن ئايرىلغانلارنىڭ سانى 42 گە يەتتى.
1743976
تۈركىيە ئاۋازى رادىيوسى خەۋىرى: كانو ئۆلكىلىك ساقچى ئىدارىسىنىڭ باياناتچىسى ئابدۇللاھ كىياۋانىڭ بىلدۈرۈشىچە، يولۇچىلار پاراخوتىنىڭ باغۋاي دەرياسىدا ئۆرۈلۈپ كېتىشىدىن كېيىن ئېلىپ بېرىلىۋاتقان ئىزدەش - قۇتقۇزۇش پائالىيەتلىرى نەتىجىسىدە يەنە 13 كىشىنىڭ جەسىتى تېپىلغان.
شۇنىڭ بىلەن ، يولۇچىلار پاراخوتى قازاسىدا ھاياتىدىن ئايرىلغانلارنىڭ سانى 42 گە يەتكەن، ئىزدەش - قۇتقۇزۇش پائالىيەتلىرى داۋامىدا 9 كىشى قۇتقۇزۇۋېلىنغان.
كانو ئۆلكىسىدە يۈز بەرگەن يولۇچىلار پاراخوتى قازاسىدىن كېيىن، ئۆلكىدىكى دەريالاردا سودا پاراخوتلىرىنىڭ پائالىيەتلىرى ۋاقىتلىق توختىتىلغانىدى.
ئىگىلىنىشىچە، نىگېرىيەدىكى يامغۇر پەسلىدە دەريالاردا پات-پات پاراخوت ھادىسىلىرى يۈز بېرىدىكەن.
