baydin yawropadiki ittipaqdashliri bilen ukraina mesilisi toghrisida sözleshti

amérika pirézidénti jo baydin firansiye, gérmaniye, italiye we engliye qatarliq döletlerning rehberliri bilen ukraina mesilisi toghrisida sözleshti.

1743862
baydin yawropadiki ittipaqdashliri bilen ukraina mesilisi toghrisida sözleshti

türkiye awazi radiyosi xewiri: amérika pirézidénti jo baydin rusiye pirézidénti wiladimir putin bilen ötküzidighan sin körünüshlük téléfon yighinidin ilgiri firansiye, gérmaniye, italiye we engliye qatarliq döletlerning rehberliri bilen ukraina mesilisi toghrisida sözleshti.

aqsaray yazma bayanat élan qilip, pirézidént jo baydinning firansiye pirézidénti émmanuél makron, gérmaniye bash ministiri angéla mérkél, italiye bash ministiri mariyo diragi we engliye bash weziri boris jonson qatarliqlar bilen téléfonda sözleshkenlikini؛ söhbet jeryanida mezkur rehberlerning rusiyening ukraina chégrasigha esker toplishi we uning barghanséri keskinlishiwatqan bayanatliridin endishe qiliwatqanliqini tilgha élip ötkenlikini uqturdi.

rehberler rusiyeni jiddiychilikni peseytishke chaqirip, normandiye formatigha asasen ishlinidighan diplomatik xizmetlerning donbastiki saqliniwatqan mesililerni miniski kélishimliri arqiliq hel qilishning birdinbir yoli ikenlikini tekitlidi.

ukrainaning igilik hoquqi we zémin pütünlükini qollaydighanliqlirini alahide tekitlep ötken rehberler, bu mesilige ortaq pozitsiye bildürüsh üchün qoyuq alaqini dawamlashturush toghrisida kélishti.

bu jeryanda aqsaray bayanatchisi jén psaki bayanat bérip, rusiye - ukraina jiddiylikini hel qilish üchün barliq diplomatik wasitilerni ishqa salidighanliqlirini we rusiye ukrainani ishghal qilghan ehwal astida, herbiy usul qollinip mudaxile qilishning özlirining deslepki tallishi emeslikini bildürdi.


خەتكۈچ: #uyghurche , #ukraina , #amérika

مۇناسىۋەتلىك خەۋەرلەر