amérika dunyaning her qaysi jayliridiki herbiy mewjutluqigha alaqidar tekshürüsh doklatini tamamlidi

türkiye awazi radiyosi xewiri: amérika qoshma ishtatliri mudapie ministirliqi — péntagon, pirézidént jo baydinning wezipige olturup uzun ötmeyla chüshürgen yolyoruqigha asasen bashlighan amérika eskerlirining yer shari miqyasidiki orunlashturulush ehwaligha munasiwetlik tekshürüsh doklatini tamamlidi.

péntagonning yuqiri derijilik bir emeldari muxbirlargha bayanat bérip, amérikaning hindi-tinch okyan rayonidiki herbiy mewjutluqi we xitay bilen bolghan riqabetning bu tekshürüshning asasiy nuqtisi ikenlikini otturigha qoydi we awstraliye bilen tinch okyandiki bezi arallargha menggülük küch orunlashturulidighanliqini tekitlidi.

mezkur emeldar, amérika eskerlirining dunyaning her qaysi jayliridiki orunlashturulush ehwaligha munasiwetlik tekshürüsh netijisige asasen, tinch okyan rayonigha yéngi küch orunlashturushning teyyarliq xizmetlirining ishliniwatqanliqini, kelgüside yawropaghimu zapas esker ewetilidighanliqini bilidürdi.

u yene, pirézidént jo baydinning sabiq pirézidént donald trampning gérmaniyediki esker sanini 25 minggha qisqartish qararini qayturuwalghanliqini eslitip ötüp, amérika mudapie ministiri loyd ostinning, tekshürüshning deslepki netijisige asasen, 500 eskerdin terkib tapqan herbiy qisim, melum sanda tik uchar ayropilan we rayon mudapie xadimlirini öz ichigealghan herbiy küchning bu döletke orunlashturulushi toghrisida buyruq chüshürgenlikini tekitlidi.

tekshürüsh doklatining tewsiyesige asasen, amérikaning ottura sherqtiki bir qisim bashqurulidighan bombidin mudapielinish sistémisi we déngiz armiyesini yawropa we tinch okyangha yötkigenlikige isharet qilghan mezkur emeldar, doklatta yene, irangha qarshi turush üchün zörür küch turghuzush we daéshqa qarshi küreshni qollashni dawamlashturushning tewsiye qilinghanliqi toghrisidiki uchurlarni sözlirige ilawe qildi.

péntagon emeldari, amérikaning ottura sherq we afriqa qitesidiki herbiy mewjutluqini muhakime qilish xizmetlirining dawamlishiwatqanliqini, bu rayonlardin esker yötkeshning dawamlishish éhtimalining barliqini qeyt qildi.