русийәниң украинаға қилидиған һәр қандақ һуҗуминиң бәдили болиду

нато баш катипи столтенберг русийәниң украина чеграсидики һәрбий паалийәтлирини әндишә ичидә көзитиватқанлиқлирини билдүрүп: «русийәниң украинаға қилидиған һәр қандақ һуҗуминиң бәдили һәмдә сийасий вә иқтисадий ақивәтлири болиду» деди.

1740761
русийәниң украинаға қилидиған һәр қандақ һуҗуминиң бәдили болиду

түркийә авази радийоси хәвири: нато баш катипи столтенберг түнүгүн (2021-йили 29-нойабир) 30-нойабир вә 1-декабир күнлири нато ташқи ишлар минстирлири йиғини өткүзүлидиған летонийә пайтәхти ригада, пирезидент егилс левитс (Egils Levits) көрүшти вә ортақ ахбарат елан қилиш йиғини уйуштурди.

у икки күнлүк йиғинда, русийәниң украина чеграсидики һәрбий паалийәтлири, беларусийәдин полша, летонийә вә литванийәгә өтүшни сақлап туруватқан киишләрниң әһвали қатарлиқ мәсилиләрниң музакирә қилинидиғанлиқини әскәртип, беларусийә һөкүмитиниң көчмәнләрдин пайдилиниватқанлиқини вә буниң район муқимлиқиға зийан салғанлиқини қәйт қилди.

у украина-русийә чеграсидики вәзийәтни йеқиндин вә әндишә ичидә көзитиватқанлиқлирини билдүрүп, сөзини мундақ давамлаштурди: «русийә бу йил (2021) һәрбий қисимлирини районға иккинчи қетим кәң көләмдә бурунқиға охшимайдиған шәкилдә йиғди. бу йәрдә еғир типлиқ қораллар, зәмбирәкләр, учқучисиз һава аппаратлири вә електронлуқ уруш системилири билән миңларчә урушқа тәййар әскәрләрни көрүватимиз. бу һәрбий қисимлар сәвәбсиз вә чүшәнчә берилмигән һалда у йәрдә туруватиду. бу әһвал җиддийчиликни күчәйтип,  чотни хата соқуш еһтималлиқини күчәйтмәктә. русийәниң украинаға қилидиған һәр қандақ һуҗуминиң бәдили һәмдә сийасий вә иқтисадий ақивәтлири болиду. русийә очуқ-ашкара болуп, җиддийчиликни пәсәйтиши керәк.»

у балтиқ районида натониң мәвҗудийитини күчәйтиш тоғрисида пилан бар-йоқлуқи соалиға: «русийә 2014-йили қиримни қанунсиз бесивалғандин кейин, нато районда мәвҗутлуқини күчәйтти. соғуқ уруш ахирлашқандин кейинки коллектип мудапиәмизни әң чоң көләмдә толуқлаш ишини йеқинқи йилларда әмәлгә ашурдуқ. натониң әскәр санини үч һәссә көпәйтип 40 миңға чиқардуқ. бу күч зөрүр тепилғанда, қисқа вақит ичидә әвәтилиду» дәп җаваб бәрди.

у натониң шималий америка вә йавропаниң иттипақи икәнликини хатирилитип, районниң дунйави тәһдитләр вә һәр хил синақларға дуч келиватқанлиқини, хитайниң йүкселиши билән дунйа күч тәңпуңлуқиниң өзгәргәнликини, буларниң йеңи истратегийәлик уқум һөҗҗәтлири ичидин орун елиши керәкликини тәкитлиди.



مۇناسىۋەتلىك خەۋەرلەر