amérika kishilik hoquq kéngishige qayta eza boldi

türkiye awazi radiyosi xewiri: b d t orgini bolghan 47 ezasi bar kishilik hoquq kéngishining 18 ezasi yéngilandi.

amérika b d t omumiy kéngishide ötküzülgen awaz tashlashta, kishilik hoquq kéngishige ezaliqigha qayta saylandi.

sabiq pirézidént donald tramp hökümiti 2018-yili «bir tereplime halda isirailiyege qarshi» ikenlikini seweb körsitip kishilik hoquq kéngishidin chékingen idi. baydin hökümiti bolsa, hakimiyet béshigha kiler-kelmeyla kishilik hoquq kéngishige qaytip kelgen idi.

amérikaning b d t da turushluq daimiy wekili linda tomas grinfld (Linda Thomas-Greenfield) saylamdin kéyin élan qilghan yazma bayanatida: «amérikaning kishilik hoquq kéngishige qaytidin eza bolushi, baydin hökümitining bergen wediliride turghanliqini körsitip béridu. biz kéngeshning pirinsiplirigha uyghun shekilde dawam qilishi üchün tirishchanliq körsitimiz» dédi.

u xizmetliride afghanistan, birma, xitay, éfiyopiye, süriye we yemen qatarliq döletlerni asasiy orungha qoyidighanliqlirini bildürüp: «meqsitimiz nahayiti éniq: kishilik hoquq qoghdighuchilirini qollash we kishilik hoquq depsendichiliklirige we süyiistémallargha qarshi awazni yuqiri kötürüsh» dédi.

u yene, kishilik hoquqta selbiy obrazgha ige döletlerning kéngeshke eza bolushigha qarshi bésim qilidighanliqlirini we kéngeshning isirailiyeni muwazinetsiz halda nishangha élishighimu qetiy qarshi turidighanliqlirini tekitlidi.

kishilik hoquq mesiliside ajiz dep tenqid qiliniwatqan éritréye, kaméron, ereb birleshme xelipiliki qatarliq döletlerning kéngeshke eza bolushi, kishilik hoquq teshkilatlirining naraziliqigha seweb boldi.

somali, bénin, gambiye, hindistan, qazaqistan, malayshiya, qatar, litwaniye, argéntina, qaratagh, honduras, paragway, finlandiye we liyuksémburg qatarliq döletler kéngeshke eza boldi. bu döletler 2022-yili 1-yanwardin bashlap kéngeshte üch yil wezipe öteydu. kéngeshtiki boshalghan 18 orungha 18 dölet namzat bolghanliqi üchün, bu döletler kishilik hoquq kéngishige reqipsiz eza boldi.