б д т «пакиз муһитниң инсан һоқуқи» икәнлики тоғрисидики лайиһәни қобул қилди
бирләшкән дөләтләр тәшкилати (б д т) кишилик һоқуқ кеңишиниң 48-нөвәтлик йиғинида, «пакиз муһитниң инсан һоқуқи икәнлики» оттуриға қойулған қанун лайиһәси көп санлиқниң қоллап беләт ташлиши билән қобул қилинди.
түркийә авази радийоси хәвири: б д т ниң җәнвәдики ишханисида өткүзүлгән йиғинда, 43 әза дөләт костарика, молдавийә, маракәш, словенийә вә шивейтсарийә тапшурған қанун лайиһәсини қоллап беләт ташлиди, русийә, һиндистан, хитай вә йапонийә беләт ташлаштин ваз кәчти.
47 әзадин тәркиб тапқан кеңәш көп санлиқниң қоллап беләт ташлиши билән мақулллиған бу қанун лайиһәсидә «пакиз, сағлам вә сиҗил муһитниң инсан һоқуқи» икәнлики қарар қилинди.
йиғиндин кейин б д т кишилик һоқуқ алий комиссари мишел бачелет йазма байанат елан қилип, бу қанун лайиһәсиниң мақулланғанлиқидин хушаллиқ һес қилғанлиқини оттуриға қойди.
бачелет кеңәшниң тунҗи қетим бундақ қарар чиқарғанлиқини тилға елип: «бу қарар инсанларни, йәршаримизни, биз нәпәслиниватқан һавани, ичидиған суни вә биз йәйдиған йемәкликләрни қоғдашни көрситиду» деди.
у дунйадики һәр қайси дөләтләрни мәзкур қарарни иҗра қилишқа чақирип: «муһит асраш һәрикәтлири билән кишилик һоқуқни қоғдаш оттурисидики хата пәрқләндүрүштин һалқип кетиш үчүн, биз чоқум бу һәрикәтләндүргүч күчни тәрәққий қилдурушимиз керәк. ениқки, һәр икки нишанға бир – биридин мустәқил һалда йәткили болмайдиғанлиқи наһайити рошән» дегәнләрни қәйт қилди.
