yawropa afghanistandiki mewjudiyitini eng töwen chekke chüshürüshni xalaydighanliqini bildürdi

türkiye awazi radiyosi xewiri: yawropa ittipaqi kéngishining bügün qobul qilinghan afghanistan toghrisidiki qararida, yawropa ittipaqining afghanistanning tinchliq we muqimliqini qoghdashta ching turidighanliqi, hemde afghan xelqini qollashni xalaydighanliqi eskertildi.

yawropa ittipaqining afghanistangha munasiwetlik yéqin kelgüsi heriket sheklini mueyyenleshtürgen qararda, ittipaqning döletning paytexti kabuldiki bixeterlik weziyitini közde tutup, herbiy mewjudiyitini  eng töwen chekke chüshürüsh niyiti barliqi qeyt qilindi we talibanning qanuniy dep qaralmaydighanliqi tekitlendi.

yawropa ittipaqi kéngishi, taliban bilen bolidighan munasiwetning ayallar we balilar hoquqini nezerde tutidighan besh türlük shertke asasen shekillinidighanliqini otturigha qoydi.

yawropa ittipaqigha eza döletlerning tashqi ishlar ministirliri séntebir éyida yighin chaqirip, talibanning bashqa döletlerge térrorchi éksport qilmasliqi, kishilik hoquqqa, qanunning küchige we médiya erkinlikige hörmet qilishi, insanperwer yardemlerni yetküzüshke qolayliq yaritip bérishi, afghanistandin chiqip kétishni xalaydighan chet elliklerning we xeter astidiki afghanlarning chiqip kétishige ruxset qilishi, afghanistandiki siyasiy küchlerning söhbet ötküzüp sighdurushchan bir hökümet qurup chiqishi qatarliq besh shertni otturigha qoyghanidi.

birleshken döletler teshkilati (b d t) ni öz ichige alghan xelqara jemiyet bilen afghanistan mesiliside hemkarliq ornitilidighanliqi tekitlengen mezkur qararda, yawropa ittipaqining afghanistanning biwasite qoshniliri bilen «rayonluq siyasiy hemkarliq munbiri» qurup chiqidighanliqi, buning nahayiti muhim ishlarning biri ikenliki qeyt qilindi.