afghanistan hökümiti taliban bilen hökümetni ötküzüp bérish muzakirisi bashlaydighan boldi
afghanistan hökümiti taliban bilen hökümetni ötküzüp bérish üchün muzakirilishishni qobul qildi.
türkiye awazi radiyosi xewiri: afghanistan ichki ishlar ministirliqi, paytext kabulning etrapidiki mehellilerge taliban kirishni bashlighandin kéyinki bayanatida, hökümetni ötküzüp bérish toghrisidiki muzakirilerning bashlinidighanliqini élan qildi.
taliban bayanatchisi zabihullah mujahid tiwittér hésabida élan qilghan bayanatida, özlirining paytext kabulning merkizini zorluq küch éshlitip igilimeydighanliqini jakarlighan idi.
zabihullah mujahid kabul nopusining zichliqi sewebidin toqunushqa kirmeydighanliqini, paytextning merkizini muzakire arqiliq alqinigha élishni xalaydighanliqini we taliban ezalirigha sheher merkizining kirish nuqtilirida saqlashni buyrighanliqini élan qilghan idi.
bu ariliqta, türkiye tashqi ishlar ministirliqi afghanistandin ayrilishni xalaydighan türkiye puqralirining derhal türkiyening kabuldiki bash elchixanisigha xewer qilishini telep qildi. elchixana nomurining «"+93 79 782 82 83"» ikenliki hembehirlendi.
taliban kabulgha kirishke bashlighanda amérika armiyesining paytexttiki bash elchixanisini tarqaqlashturghanliqi bildürüldi.
shimaliy atlantik ehdi teshkilatining bayanatigha asaslanghanda, yawropa ittipaqi xadimlirimu kabulda téximu bixeter bir jaygha yötkelgen.
pakistanmu talibanlarning kontrolluqigha ötüp ketken torxam chégrasini taqighanliqini élan qildi. bu qararning afghanistandiki «pewquladde weziyet» sewebidin élinghanliqi bildürüldi.
