б д т афғанистанда «ислам әмирлики» ни қоллимайдиғанлиқини уқтурди

бирләшкән дөләтләр тәшкилати афғанистанда «ислам әмирлики» ниң қайта тиклинишини қоллимайдиғанлиқини уқтурди.

1685397
б д т афғанистанда «ислам әмирлики» ни қоллимайдиғанлиқини уқтурди

түркийә авази радийоси хәвири: бирләшкән дөләтләр тәшкилати хәвпсизлик кеңиши, ортақ байанат елан  қилип, афғанистан дөләт хәвпсизлик күчлириниң өлүп кетишини кәлтүрүп чиқарған афғанистанниң һерат шәһиридики бирләшкән дөләтләр тәшкилати қорусиға қилинған һуҗумни қаттиқ әйиблиди.

афғанистандики зораванлиқ вә кишилик һоқуқ дәпсәндичиликлириниң көпийип кетишидин қаттиқ әндишә қиливатқанлиқини билдүргән бирләшкән дөләтләр тәшкилати хәвпсизлик кеңиши, дөләттики барлиқ террорлуқ һуҗумлири вә пуқраларға қәстән һуҗум қилиш һадисилириниму қаттиқ әйиблиди.

пуқраларға, бирләшкән дөләтләр тәшкилатиниң хизмәтчи – хадимлириға вә бирләшкән дөләтләр тәшкилатиниң қорулириға қаритилған қәстән һуҗумларниң, «уруш җинайити» ни шәкилләндүридиғанлиқини уқтурған бирләшкән дөләтләр тәшкилати хәвпсизлик кеңиши, афғанистан һөкүмити вә талибанни, кәң даирилик вә афғанистанлиқларниң рәһбәрликидики сийасий һәл қилиш чариси тепишқа вә уруш тохтитишқа чақирди.

киризискә һәрбий һәл қилиш чариси тепилмайдиғанлиқини әскәрткән бирләшкән дөләтләр тәшкилати хәвпсизлик кеңиши, талибанни мисал кәлтүрүп, афғанистанда «ислам әмирлики» ниң қайта тиклинишини қоллимайдиғанлиқини билдүрди.



مۇناسىۋەتلىك خەۋەرلەر