канада баш министири: канадада ислам дүшмәнликигә орун йоқ

канада баш министири җастин трудо дөлитидә ислам дүшмәнликигә орун йоқлуқини ейтти.

1679050
канада баш министири: канадада ислам дүшмәнликигә орун йоқ

түркийә авази радийоси хәвири: ислам дүшмәнлики мәмликәтлик башлиқлар йиғини, трудо һөкүмитиниң көп сандики министирлири, дөләт органлириниң башлиқлири, мусулманларға аит аммиви тәшкилатларниң мәсуллири вә җәмийәтниң охшимиған қатламлириниң рәһбәрлириниң иштирак қилишида тор муһити астида  чақирилди.

канада баш министири җастин трудо, йиғинда қилған сөзидә, мундақ деди: «шуни ениқ айдиңлаштурувелишимиз керәкки, канадада ислам дүшмәнликигә орун йоқ, әмма бу дүшмәнлик бир күндила йоқайдиған ишму әмәс. мусулман канадалиқларни қоғдаш үчүн һәрикәткә өтүшни давамлаштуридиғанлиқимизни конкрет йоллар арқилиқ бекитип чиқтуқ, һәмдә бу дүшмәнлик қачан вә қәйәрдә оттуриға чиқса чиқсун, бир тәрәп қилиш әһдимизни йеңилидуқ. һөкүмәт болуш сүпитимиз билән җамәләр вә җәмийәт мәркәзлирини қоғдаш йолида мәбләғ селиватимиз.  тор әсәбийликлири вә радикаллиқ торлирини бузуп ташлап, ашқун оңчил өчмәнлик гуруппилирини чәкләватимиз. дөләт миқйасида мусулман канадалиқлар билән бирликтә һәммини бағриға басидиған, бихәтәр вә һөрмәткә сазавәр бир канада бәрпа қилишни давамлаштуримиз.»

мусулманларни өз ичигә алған һәр бир гуруппа вә етиқадтин кишиләрниң, кочиларда, сода сарайларда вә хәлқкә очуқ саһәләрдә бихәтәр вә әркин – азадә һалда һәрикәт қилалишиниң зөрүрлүкини әскәрткән трудо, буниң үчүн тегишлик қәдәмләрни ташлашни давамлаштуридиғанлиқлирини қәйт қилди.



مۇناسىۋەتلىك خەۋەرلەر