israiliye pirézidénti: pelestin - israiliye tinchliq söhbitini eslige keltürüshni xalaymen
israiliye pirézidénti isak hérzog, pelestin pirézidénti mehmud abbasqa israiliye – pelestin ikki terep söhbitini qayta bashlashni xalaydighanliqini bildürdi.
türkiye awazi radiyosi xewiri: pelestin pirézidénti mehmud abbas, 7-iyul qesem bérip wezipe tapshurup alghan hérzogqa téléfon qilip tebriklidi.
hérzog tiwittérdiki adrésida uchur hembehrilep: «men bügün kechte pelestin pirézidénti abbas bilen sözleshtim we uninggha ilgiriki israiliye prézidéntlirigha oxshash pelestinlikler bilen israiliyelikler otturisidiki söhbetni eslige keltürüp dawamlashturush pilanimning barliqini yetküzdüm» dégenlerni qeyt qildi.
hérzog diyalogning munasiwetni yaxshilap, ikki xelq otturisida tinchliq ornitishqa yardem qilishini ümid qilidighanliqini éytti.
pelestin xewer agéntliqi - WAFA ning xewirige qarighanda, abbas hérzog bilen körüshkende ghezze, iyordan deryasining gherbiy qirghiqi we quddusta uzun muddetlik tinchliqni ishqa ashurushning shert ikenlikini tekitligen, hemde keng dairilik we adil tinchliq ornitishning kéreklik sharaitini hazirlash üchün emeliy qedemlerni bésishning muhimliqini otturigha qoyghan.
israiliyening «qanal 12» téléwiziyesi buningdin burunqi xewerliride, pelestin pirézidénti mehmud abbasning pelestin - israiliye tinchliq söhbitini eslige keltürüsh üchün telep tizimliki teyyarlighanliqini ilgiri sürgenidi.
israiliye bilen pelestin otturisidiki tinchliq söhbiti, israiliye «1967 – yildiki chégralarni mejburiy köchürülüshke duchar qilinghan pelestinliklerning qaytishigha échish we qanunsiz yehudiy olturaq rayonlirini tesis qilishni toxtitish» telipini qobul qilmighachqa, 2014-yili 4-ayda toxtap qalghanidi.
