pelestin, hamas we iyordaniye hondurasqa naraziliq bildürdi
pelestin, hamas we iyordaniye hondurasning tél awiwdiki elchixanisini quddusqa yötkishige naraziliq bildürdi.
türkiye awazi radiyosi xewiri: pelestin tashqi ishlar ministirliqi teripidin bu heqte élan qilinghan yazma bayanatta, mundaq déyildi: «<birleshken döletler teshkilatining qararliri we xelqara qanunni depsende qilish> dégen uqumni bildüridighan hondurasning tél awiwdiki elchixanisini quddusqa yötkishini qattiq eyibleymiz.»
honduras pirézidéntining xataliq terepte turup qarar chiqarghanliqi eskertilgen bayanatta, buning tolimu epsuslinarliq ish ikenliki, hondurasning tél awiwdiki elchixanisini quddusqa yötkesh qararining, ishghal küchlirining pelestin xelqige qarshi depsendichilikliri barghanséri ewj élip kétiwatqan bir peytke toghra kélishining diqqet qozghaydighanliqi qeyt qilindi.
iyordaniye tashqi ishlar ministirliqi teripidin élan qilinghan yazma bayanatta, iyordaniyening hondurasning bu qedimini ret qilidighanliqi hem eyibleydighanliqi, chünki buning xelqaraliq qararlargha xilap qilmish ikenliki bildürüldi.
quddus shehirining salahiyitini özgertish nishanigha yétish meqsitide tashlanghan herqandaq bir qedemningmu shek - shübhisiz halda qanunsizliq we inawetsiz ikenliki eskertilgen bayanatta, keng dairilik we adil bir tinchliq teklipi sunushning muhimliqi, birleshken döletler teshkilatining qararlirigha asasen, ikki döletlik tüzümning ijra qilinishining zörürlüki tekitlendi.
hamas (pelestin islamiy tirkishish herikiti) bolsa, hondurasning xelqara qanungha xilap halda ishghal astidiki quddusta elchixana échishini eyiblidi, hondurasning bu qedimining, pelestin xelqining heq – hoquqlirigha qarita (ochuq – ashkara tajawuz qilish) hésablinidighanliqini bildürüp, honduras hökümitini xelqara qanungha riaye qilip, bu qararidin waz kéchishke chaqirdi.
hamas yene, «pelestin xelqining erkinlik we musteqilliq heq – hoquqlirini qoghdash üchün jiddiy heriketke ötüsh» toghruluq chaqiriqta boldi.
