maas türkiye – yawropa ittipaqi köchmenlik kélishimining yéngilinishini telep qildi
gérmaniye tashqi ishlar ministiri héyko maas yawropa ittipaqi bilen türkiye otturisidiki köchmenlik kélishimining yéngilishini telep qildi.
türkiye awazi radiyosi xewiri: maas, gérmaniyede chiqidighan «‹wélt› géziti» ge bergen bayanatida, türkiye bilen köchmenlik mesilisidiki hemkarliqni yéngilashqa éhtiyaj barliqini tekitlep mundaq dédi: «türkiye hökümiti bilen bolghan barliq qiyinchiliqlargha qarimay, bu döletning sel qarashqa bolmaydighan köchmenlik yükini biz üchün öz üstige alghanliqini qobul qilishimiz kérek.»
türkiyede texminen 4 milyon süriyelik we rayondiki bashqa döletlerdin kelgen musapirlarning yashawatqanliqini eskertken maas, «yawropa ittipaqida bizning türkiye bilen bolghan köchmenlik kélishimning téximu tereqqiy qildurulushi we yéngilinishigha intayin köngül bölidighanliqimizgha ishinimen» dédi.
u, köchmenlik mesiliside yéngi kélishim hasil qilinghan teqdirde, yawropa ittipaqining türkiyege maddiy yardem bérishige munasiwetlik soalgha jawab bérip mundaq dédi: «herqandaq bir reqemni otturigha tashlashni xalimaymen, emma buning pulsiz ishqa ashmaydighanliqi hemmige besh qoldek ayan.»
eng muhimi türkiyening iqtisadiy jehettin zor bedel töligenliki we buning sayisida bashqilarning pul téjep qalalighanliqini tekitligen maas, buning milyonlighan kishilerning halidin xewer élishqa munasiwetlik bir mesile ikenlikini éytti.
