gérmaniye taratquliri türkiyening qoralliq uchquchisiz hawa apparatlirini maxtidi
türkiyening qoralliq uchquchisiz hawa apparatliri gérmaniye taratqulirida küntertipke kélishini dawamlashturmaqta.
türkiye awazi radiyosi xewiri: bu qétim gérmaniyede chiqidighan «‹xandélsblat› géziti» (Handelsblatt) ning, türkiyening qol ilkidiki qoralliq uchquchisiz hawa apparatliri heqqide élan qilinghan xewiride, türkiyening qoralliq uchquchisiz hawa apparatlirining süriye, liwiye we qarabaghda özining özgiche iqtidarini namayen qilghanliqi tekitlinip mundaq déyildi: «türkiyening qoralliq uchquchisiz hawa apparatlirini ukraina we polsha sétiwaldi, téximu köp dölet sétiwélishni kütmekte. mutexessislerning qarishiche, türkiyening qoralliq uchquchisiz hawa apparatliri yéngi dewrdiki urushta yéngi ölchem hésablinidiken.»
gézitning xewiride, bayqar guruhining téxnika ishliri mudiri selchuq bayraqtargha yuqiri baha bérilip mundaq déyildi: «41 yashliq türk karxanichi bayraqtar, qoralliq uchquchisiz hawa apparatliri arqiliq dölitini yüz bergüsi urushlarda téximu yaxshi kartigha ige qildi.»
xewerde yene, ottura sherq mutexessisi charliz listérning, «bayraqtar guruhining qoralliq uchquchisiz hawa apparatliri 20-esirdiki rusiyening <AK-47> tipliq aptomatigha oxshash shekilde urushta yéngi dewrning yéngi ölchimi» dep atighanliqi qeyt qilindi.
gézit, türkiyening uchquchisiz hawa apparatliri we qoralliq uchquchisiz hawa apparatliri toghruluq türkiye dölet mudapie ministirliqining ammiwi ortaqlishish tor bétidiki sehipiliridin we türkiye radiyo – téléwiziye orgini (TRT) ning téléwiziye qanalliridin widéolarning sistémiliq halda élan qilinghanliqini tekitlidi.
gézitning xewiride qarashlirigha orun bérilgen amérika qoshma ishtatliri tetqiqat orunliridin tash siyaset tetqiqat inistitutining ottura sherq pirogrammisi diréktori aron stéyn, türkiyening bu widéolarni tarqitip, ammiwi taratqu zamanida uchquchisiz hawa apparatlirining ishlitilishige bashlamchiliq qilghanliqini tekitlesh bilen bir waqitta, közitish, charlash we toqunush rayonlirida uchquchisiz hawa apparatlirini ishlitishning yéngi ehwal emeslikini eskertip mundaq dédi: «lékin türkiye buni yéngi sewiyege yetküzdi, hemde döletlerning bu arqiliq qandaq istiratégiyelik tesir küchke ige bolalaydighanliqi we xelqara bazarlarning diqqitini qoral – yaragh sétish ishlirigha qandaq buriyalaydighanliqini ispatlap berdi.»
