б д т ливийә алаһидә вәкили кубис әлкони билән көрүшти

түркийә авази радийоси хәвири: ливийә пирезидентлиқ кеңиши ахбарат ишханиси йазма байанат елан қилип, кубисниң пайтәхт траблуста пирезидентлиқ  кеңишиниң муавин рәиси муса әлкони билән көрүшкәнликини уқтурди.

учришишта, «диққәтни сайлам өткүзүшкә мәркәзләштүрүш вә һәқиқий мәнидики миллий йаришишни капаләткә игә қилиш хизмәтлирини давамлаштурушниң әһмийити»ни тәкитлигән б д т вәкили кубис, ливийә сайлам комитетиниң бүгүнгичә болған тәййарлиқ хизмәтлиридин мәмнун болғанлиқини оттуриға қойди.

пирезидентлиқ кеңишиниң кәң даирилик миллий йаришишни ишқа ашуруш вә сайламниң пиланланған вақтида өткүзүлүши үчүн тиришчанлиқ көрситиватқанлиқини билдүргән муса әлкониму, ливийә сийасий сөһбәт мунбирини сайламниң әркин муһитта өткүзүлүшигә капаләтлик қилидиған асасий қанунлуқ йаришиш һасил қилишқа чақирди.

б д т башчилиқида һәр хил сийасий вә иҗтимаий қатламлардин талланған 75 киши билән елип бериливатқан ливийә сийаси сөһбәт мунбири, 2021- йили 24- декабир ливийәдә омумийүзлүк сайлам өткүзүшни қарар қилғаниди. мунбәр йәнә, сайламниң асасий қанунға уйғун йаки әмәсликини тәкшүрүш үчүн «сийасий сөһбәт мунбири қанун комитети» қуруп чиққаниди.