hamas: ghezzede 1 – 2 kün ichide urush toxtitish kélishimi hasil qilinishi mumkin
hamasning siyasiy biyurosining muawin mesuli musa ebu merzuq, ghezzede 1 – 2 kün ichide urush toxtitish kélishimi hasil qilinishni texmin qiliwatqanliqini éytti.
türkiye awazi radiyosi xewiri: ebu merzuq, liwanning «‹elmeyadin› téléwiziye qanili» gha bergen bayanatida, urush toxtitish üchün körsitiliwatqan tirishchanliqlarning muweppeqiyet élip kélishini kütüwatqanliqini tekitlep mundaq dédi: «ghezzede 1 – 2 kün ichide urush toxtitish kélishimi hasil qilinidighanliqini texmin qiliwatimen.»
israiliyening köpligen aldinqi seplerde urush qilish küchining yoqluqini qeyt qilghan ebu merzuq, shu wejidin, tél awiwning wehshilerche hujumlirini köpeytishidin endishilik ikenlikini eskertish bilen bir waqitta, amérika qoshma ishtatlirining bashlanghuchta bu mesilini birleshken döletler teshkilati xewpsizlik kéngishide muzakire qilinishini qobul qilmighanliqini tekitlep mundaq dédi: «washingtonning pozitsiyesi, pelestin tirkishishining tél awiwgha zerbe bérishidin kéyin özgerdi.»
yene bir tereptin, israiliye dölet xewpsizlik dairilirining, ghezze rayonida jüme künidin burun urush toxtitilishini kütmeydighanliqi bildürüldi.
israiliyening «‹qanal 12› téléwiziyesi» ning xewer qilishiche, israiliye dölet xewpsizlik dairiliri, ghezzege qaritilghan hujumlarning jüme künidin burun toxtitilishini kütmeydiken.
