birmadiki namayishlarda onlarche kichik balining ölgenliki bildürüldi

türkiye awazi radiyosi xewiri: birma xewpsizlik küchlirining herbiy siyasiy özgirishke we saylanghan hökümet ezalirining tutup turulushigha qarshi élip bériliwatqan namayishlargha qoralliq arilishishi netijiside qaza qilghan 781 kishining 52 nepirining kichik  balilar ikenliki bildürüldi.

siyasiy mehbuslargha yardem bérish teshkilatining kündilik doklatida, yéqinqi 24 saet ichide yene bir kishining qaza qilghanliqi, shuning bilen, herbiy –  siyasiy özgirishke qarshi bashlanghan namayishlarda qaza qilghanlar omumiy sanining 781 ge yetkenliki, qaza qilghanlarning 52 nepirining 18 yashtin töwen balilar ikenliki qeyt qilindi.

doklatta, hazirghiche 3843 ademning nazaret astigha élinghanliqi, siyasiy özgirishke qarshi chiqqan 1561 adem üstidin tutush buyruqi chiqirilghanliqi toghrisidiki uchurlargha orun bérildi.

yene bir tereptin, herbiy – siyasiy özgirishtin ilgiriki milliy démokratik birlik hökümiti mezgilining arakan ölkisi siyasiy emeldari nyi puning qizi moé san su jining nazaret astigha élinghanliqi bildürüldi.

birma armiyesi 2020-yili 8-noyabirda ötküzülgen saylamgha hiyle arilashturulghanliqining ilgiri sürülüshi, shundaqla birmada siyasiy ixtilaplarning küchiyip kétishini bahane qilip, 2021-yili 1-féwral hakimiyetni tartiwalghanidi.

birma armiyesi yene, tashqi ishlar ministiri, shundaqla döletning emeliy rehbiri ang san suchi qatarliq hökümet emeldarliri bilen hakimiyet béshidiki nurghun partiye mesullirini tutqun qilip, bir yilliq jiddiy halet élan qilghan idi.

bir terepte birmada keng kölemlik namayishlar ötküzülmekte, yene bir terepte nazaret astidiki yuqiri derijilik hökümet emeldarliri herbiy sotta sotlanmaqta.