сабиқ пирезидент трамп американиң афғанистандин чекиниш қарарини махтиди
американиң сабиқ пирезиденти доналд трамп җо байдин һөкүмитиниң америка әскәрлирини афғанистандин чекиндүрүш қарариға «қалтис вә иҗабий» дәп баһа бәрди.
түркийә авази радийоси хәвири: сабиқ пирезидент доналд трамп америка әскәрлириниң афғанистандин чекиниш мусаписи тоғрисида йазма байанат елан қилди.
у байанатида: «афғанистандин чиқиш қалтис вә иҗабий иш. мән 1-майда чекинишни пилан қилған идим. имканийәтниң беричә, мәзкур мусапини бу вақитқа йеқин һалда әмәлгә ашурушимиз керәк» деди.
трамп чекиниш мусаписи үчүн бәлгиләнгән 11-сентәбир күниниң америка тарихи үчүн матәм күни икәнликини вә бу шәкилдә давамлишиши керәкликини билдүрди.
трамп 2020-йили февралда талибан билән түзүлгән келишимдә бәлгилик шараитлар астида америка әскәрлириниң афғанистандин 2021-йили 1-майғичә чекинидиғанлиқи тоғрисида вәдә бәргән иди. 2021-йили пирезидентлиқ һоқуқини тапшурувалған җо байдин сани 2 миң 500 әтрапида болған америка әскәрлириниң чекиниш вақтини 2021-йили 1-майда башлап 11-сентәбиргичә ахирлишидиғанлиқини елан қилған иди.
америка конгрәсидә демократлар пирезидент байдинниң чекиниш пиланини қоллиса, җумһурийәтчиләрниң көп қисми «американиң афғанистанни муәлләқтә ташлап қойғанлиқини» вә «у йәрдә террорлуқниң қайтидин көпийидиғанлиқини» илгири сүрмәктә.
