baydin mérkél bilen téléfonlashti
amérika qoshma ishtatliri pirézidénti jo baydin gérmaniye bash ministiri angéla mérkél bilen téléfonda körüshti.
türkiye awazi radiyosi xewiri: aqsaray teripidin élan qilinghan bayanatta, téléfon söhbitide, amérika qoshma ishtatliri pirézidénti jo baydin bilen gérmaniye bash ministiri angéla mérkélning, ukrainaning zémin pütünlüki we igilik hoquqini qollaydighanliqlirini yene bir qétim tekitligenliki, transatlantik munasiwetler dairiside ehdige wapa qilishning zörürlükini bildürgenliki, shuning bilen bir waqitta, «kowid – 19» yuqumigha qarshi küresh, yer shari xaraktérlik saghlamliq bixeterlikini kücheytish, kilimat özgirishige qarshi küresh qatarliq her ikki terep ortaq köngül bölidighan mesililerde zich hemkarliq ornitish toghruluq birdeklik hasil qilghanliqi eskertilip mundaq déyildi: «ikki rehber, rusiyening ukraina chégrasi we ishghal astidiki qirimgha qisim orunlashturush mesiliside endilishilirini otturigha qoydi, ukrainaning igilik hoquqi we zémin pütünlükini qollaydighanliqlirini yene bir qétim bayan qildi.»
amérika qoshma ishtatliri pirézidénti jo baydinning, afghanistanda shimaliy atlantik ehdi teshkilatining qetiy irade bilen yardem bérish qismigha qoshqan töhpiliri üchün gérmaniye bash ministiri angéla mérkélge rehmet éytqanliqi eskertilgen bayanatta, ikki rehberning, afghanistanda tinchliq ornitish yolidiki tirishchanliqlarni qollash mesiliside ortaq tonush hasil qilghanliqi bildürüldi.
