ھىندىستاندا ماۋزىدۇڭچى تېررورچىلار 22 ئەسكەرنىڭ جېنىغا زامىن بولدى

تۈركىيە ئاۋازى رادىيوسى خەۋىرى: ھىندىستان دۆلەت مەتبۇئاتلىرىنىڭ خەۋەرلەرىگە ئاساسلانغاندا، چاتىسگار ساقچى ئىدارىسى باشلىقى ئاشوك جۇنېجا ئېلان قىلغان باياناتىدا، بىجاپۇر شەھىرىدە بىخەتەرلىك قىسىملىرىنىڭ ئورمانلىق رايونىدىكى بىر پاناھجايغا قارىتا ئېلىپ بارغان ھەرىكىتىدە ماۋزىدۇڭچى تېررورچىلار بىلەن توقۇنۇش يۈز بەرگەنلىكىنى ئېيتقان.

ئاشوك جۇنېجا توقۇنۇشتىن كېيىن يەنە 17 ئەسكەرنىڭ جەسىتى تېپىلغانلىقىنى ۋە شۇنىڭ بىلەن جېنىدىن ئايرىلغان ئەسكەرلەر سانىنىڭ 22 گە يەتكەنلىكىنى بايان قىلىپ، 32 ئەسكەرنىڭ يارىلانغانلىقىنى بىلدۈردى.

ئاشوك جۇنېجا توقۇنۇشتا، 15 نەپەر ماۋزىدۇڭچى تېررورچىنىڭ ئۇجۇقتۇرۇلغانلىقىنى ئەسكەرتتى.

ئالاقىدار مەسئۇللار تۈنۈگۈن ئېلان قىلغان باياناتىدا، 4 سائەت داۋاملاشقان توقۇنۇشتا 5 ئەسكەرنىڭ قازا قىلغانلىقىنى ۋە 12 ئەسكەرنىڭ يارىلانغانلىقىنى بىلدۈرگەن ئىدى.

خىتاينىڭ ئىنقىلابى رەھبىرى ماۋزېدۇڭدىن ئىلھام ئالغان ھىندىستاندىكى ماۋزىدۇڭچى تېررورچىلار 1967-يىلدىن بۇيان ھىندىستاننىڭ شىمالىي، شەرقىي ۋە مەركىزىدىكى نۇرغۇن ئۆلكىلەردە قوراللىق ھەرىكەت قىلىپ كەلمەكتە.