nato: iraqta amérika qisimmlirining rolini üstimizge almaymiz

türkiye awazi radiyosi xewiri: shimaliy atlantik okyan ehdi teshkilati — natoning iraqta turushluq wekili léyténant général piér olsén, özige qarashliq qisimlarning iraq armiyesini meshiq qildurush we ulargha meslihet bérish xizmitini izchil dawamlashturidighanliqini, emma amérika qisimlirining rolini oynashni qetiy üstige almaydighanliqini bildürdi.

olsén asiya téléwiziye qanilining soallirigha jawab bérip: «iraqtiki küchlirimizning sani 300 din ashidu, bizning urush qilishtin bashqa bir wezipimiz bar» dédi.

olsén yene meshiq qildurulidighan we meslihet bérilidighan organlarning kelgüsi bir nechche ay ichide ötküzülidighan yighinlar netijiside békitilidighanliqini bayan qildi.

u, iraq dölet bixeterlik ishliri meslihetchisi qasim arajining resmiy halda iraqtiki shimaliy atlantik  okyan ehdi teshkilati eskerlirining sanini köpeytishni telep qilghanliqini eskertip:  «nato amérikaning iraqtiki rolini  qetiy üstige almaydu» dédi.

yene bir tereptin olsén, iraq hökümitining nato qisimlirini her qandaq qoralliq hujumdin qoghdashqa köngül bölgenlikini qeyt qildi.

nato bash katipi yéns stolténbérg 18 – féwralda bayanat bérip: «biz bügün iraq armiyesining térrorluqqa qarshi turush kürishini qollash we daésh térrorluq teshkilatining qaytidin bash kötürüshining aldini élish üchün natoning iraqtiki wezipe dairisini kéngeytishni qarar qilduq. xadimlirimizning sani 500 din töt minggha köpeytilidu. telim – terbiye pilanigha iraq organliri bilen baghdad sirtidiki rayonlarmu kirgüzülidu» dégenidi.