rusiye amérikaning jaza yürgüzüsh qararigha inkas qayturidighanliqini uqturdi

türkiye awazi radiyosi xewiri: rusiye tashqi ishlar ministirliqi bayanatchisi mariya zaxarowa, amérikaning rus öktichi alékséy nawalniyning zeherlinishi we qolgha élinishi mesilisini ilgiri sürüp chiqarghan «rusiyege jaza yürgüzüsh qarari»gha oxshash usulda inkas qayturush pirinsip boyiche jawab qayturidighanliqini uqturdi.

bayanatchi mariya zaxarowa yazma bayanat élan qilip, amérika hökümiti jaza yürgüzüsh qarari chiqirish arqiliq «yawropa ittipaqi bilen masliship  moskwani jazalash üchün rusiyege qarshi düshmenlerche hujum qozghighanliqi»ni otturigha qoydi.

u, aqsarayning özining ichki mesilisini bir chetke qayrip qoyup, tashqi düshmen yaritishqa urunuwatqanliqini ilgiri sürdi.

jaza yürgüzüshning sewebi süpitide alékséy nawalniyning atalmish ​​herbiy ximiyelik dora bilen zeherlengenlikining ilgiri sürülüshige «bimene» dep baha bergen zaxarowa: «bularning hemmisi bizning ichki ishlirimizgha arilishishni dawamlashturushning ochuq bahanisi. bizning buninggha qarap turush niyitimiz yoq. biz oxshash usulda jawab bérish pirinsipi boyiche inkas qayturimiz» dédi.

jaza yürgüzüsh yaki bashqa bésimlar arqiliq rusiyege bir nersilerni téngishni nishan qilghan pilanlarning ilgirikige oxshashla hazirmu meghlup bolidighanliqini bildürgen zaxarowa: «amérikaning jazasining qandaq bolushidin qetiynezer, biz her qandaq tajawuzchiliqqa qarshi turush arqiliq dölet menpeetimizni izchil we keskin qoghdaymiz. biz (amérikaliq) xizmetdashlirimizni ot bilen oynashmasliqqa chaqirimiz» dégenlerni qeyt qildi.

amérika moskwani rus öktichi alékséy nawalniyni zeherlesh we qolgha élish bilen eyiblep, rusiyelik yette emeldar bilen 14 rus orginigha jaza yürgüzüshni qarar qilghanidi.