киремил әрменийәдики өзгиришләр тоғрисида байанат елан қилди

түркийә авази радийоси хәвири: әрменийә баш министири никол пашинйан өзини истепа беришкә чақирған баш иштаб башлиқини вәзипидин елип ташлиди.

әрменийә баш иштаб башлиқи вә барлиқ йуқири дәриҗилик қоманданлар байанат елан қилип, баш министир пашинйанни истепа беришкә чақирди.

байанатта, пашинйан һөкүмитиниң һалқилиқ, шундақла йетәрлик қарарларни чиқиралмайдиғанлиқи вә буниңға қадир әмәслики қәйт қилинди.

әрменийә баш министири армийәниң истепа бериш чақириқини «сийасий өзгириш» дәп атап, қоллиғучилирини кочиға чиқип намайиш қилишқа чақирди.

русийә пирезидентлиқ мәһкимиси — киремил бу һәқтә байанат елан қилип, әривандики өзгиришләрниң әндишә ичидә  көзитиливатқанлиқини, русийә пирезиденти виладимир путин билән пашинйанниң техи алақилашмиғанлиқини вә зөрүр тепилғанда алақә орнитиш үчүн керәклик орунлаштурушларниң қилинғанлиқини уқтурди.

киремил сарийи байанатчиси димитрий песков тәрипидин елан қилинған байанатта: «әрменийәдики өзгиришләрни көзитиватимиз. бирақ, йүз бәргән иш әрменийәниң ички ишлар мәсилиси. биз әрменийәдики һәммәйләнни мөтидил болушқа чақиримиз, вәзийәт чоқум асасий қанун рамкисидин чиқип кәтмәслики керәк» дегәнләрни қәйт қилди.