amérika parizh kilimat özgirishi kélishimige resmiy qaytti

türkiye awazi radiyosi xewiri: amérika tashqi ishlar ministiri antoni blinkén amérikaning bügün (2021-yili 19-féwral) din bashlap parizh kilimat özgirishi kélishimige resmiy qaytip kelgenlikini élan qildi.

u yazma bayanatida, parizh kilimat özgirishi kélishimining yer sharining issip kétishi we buning tesiride kilimatta yüz bergen özgirishlerning aldini élish nuqtisidin tengdishi yoq «muhit kélishimi» ikenlikini tekitlidi.

u: «2016-yili kélishimge ishtirak qilishimiz, bügün bolsa kélishimge qaytidin ishtirak qilishimiz, buningdin kéyin kéyinki heptilerde, aylarda we yillarda némilerni qilidighanliqimiz nuqtisidin muhim ehmiyetke ige» dédi.

u amérikaning ikki tereplik we köp tereplik uchrishishlarda, kilimat özgirishini küntertipke qoyidighanliqini alahide eskertip: «emdi kilimat özgirishi we bilim diplomatiyesi tashqi siyasetlerde hergizmu qoshumche téma bolmaydu. kilimat özgirishining heqiqiy tehditlirige diqqetni merkezleshtürüsh we bilim ademlirimizge qulaq sélish, bizning ichki we tashqi siyasetlirimizde aldin ehmiyet béridighan merkiziy mesililer bolidu» dédi.

u pirézidént jo baydinning 22-aprél (2021) ötküzülidighan aliy rehberler kilimat yighinigha qatnishidighanliqini bildürdi.

sabiq pirézidént donald tramp 2017-yili iyunda amérikaning parizh kilimat özgirishi kélishimidin chékinidighanliqini élan qilghan we 2019-yili 4-noyabir bu kélishimdin resmiy chékingen idi.