iran: yaponiye we yawropa ittipaqidin baydinni qayil qilishini kütüwatimiz
iran tashqi ishlar ministiri muhemmed jewad zerif yaponiye we yawropa ittipaqidin amérika qoshma ishtatlirining téhrangha qaratqan émbargolirigha qarshi pirézidént jo baydinni qayil qilishini kütüwatqanliqlirini éytti.
türkiye awazi radiyosi xewiri: ministir zerif, «‹ Kyodo› agéntliqi» bilen ötküzgen söhbitide, amérika qoshma ishtatlirining irangha qarshi yürgüzüwatqan émbargoliri, yaponiyening muressechilik roli oynash éhtimalliqi we iranning yaponiye bankiliridiki mal – mülükliri heqqide toxtaldi.
dölitige qarshi amérika qoshma ishtatlirining sabiq pirézidénti donald tramp hökümiti teripidin yolgha qoyulghan iqtisadiy émbargolarning bikar qilinishi üchün yaponiye bilen yawropa ittipaqining, amérika qoshma ishtatliri pirézidénti jo baydinni qayil qilishini kütüwatqanliqlirini éytqan zerif, yaponiyening «iranning qedinas dosti» we amérika qoshma ishtatliri bilen yaxshi munasiwetlerge ige bir dölet ikenlikini tekitlep mundaq dédi: «aldi bilen xelqara qanun saheside yaponiyening bir dost süpitide heriketke ötüshini ümid qilimiz.»
amérika qoshma ishtatliri irangha qarshi yürgüzüwatqan émbargolarning qanunsiz ikenlikini ilgiri sürgen zerif, mundaq dep körsetti: «amérika qoshma ishtatliri xelqara qanunni depsende qilghanliqtin, yaponiye öz üstige alidighan eng yaxshi rol, amérikaliqlarning qanunsiz qararlirini ijra qilmaydighanliqlirini ulargha körsitip qoyushidur.»
zerif, 2020 – yili, séntebir éyida wezipige olturghan yaponiye bash weziri suga yoshihidé hökümitige, amérika qoshma ishtatlirining émbargoliri sewebidin yaponiye bankilirida tonglitip qoyulghan irangha ait mal – mülükler we sermayelerge qarita cheklimilerni yéniklitish toghruluq chaqiriqta boldi.
zerifning qarishiche, émbargolar sewebidin yaponiye we jenubiy koriye bankilirida, irangha ait texminen 10 milyard dollarliq mal – mülükler we sermayeler tonglitip qoyulmaqta iken.
