йавропа иттипақи ливийә вақитлиқ һөкүмитини қоллиди

йавропа иттипақи, ливийә пирезидентлиқ кеңиши вә әзалири билән баш министирниң сайланғанлиқини мәмнунлуқ билән қарши алидиғанлиқини, йеңи вақитлиқ һөкүмәт билән бирликтә хизмәт қилишқа тәййар икәнликини билдүрди.

1579217
йавропа иттипақи ливийә вақитлиқ һөкүмитини қоллиди

түркийә авази радийоси хәвири: йавропа иттипақи ташқи мунасивәтләр вә бихәтәрлик сийасити алий вәкили җосеп борел (Josep Borrell) йавропа кеңиши намида байанат елан қилип, йавропа иттипақи вә әза дөләтләрниң ливийәдә вақитлиқ һөкүмәтниң қурулғанлиқини, берлин мусаписиниң муһим мусапә теши дәп қарайдиғанлиқини әскәртти.

йавропа иттипақи ташқи мунасивәтләр вә бихәтәрлик сийасити алий вәкили җосеп борел ливийә сийасий дийалог мунбиридики сайлам нәтиҗисидә, 2021-йили 24-декабир өткүзүш пилан қилинған омумий сайламғичә вәзипә өтәйдиған пирезидентлиқ кеңишиниң рәисликигә сайланған муһәммәд әл мәнфи, баш министирлиққа сайланған абдулһамит дубәйбә билән бирликтә хизмәт қилишқа тәййар икәнликлирини билдүрди.

у ливийәниң бирлики вә иттипақлиқи үчүн хизмәт қилидиған йеңи вә кәң даирилик һөкүмәтниң қурулушиға еһтийаҗлиқ икәнликлирини тәкитләп, берлин конферансидин буйан ливийәниң тинчлиқ вә муқимлиқ йолида чоң илгириләшләрни қолға кәлтүргәнликини әскәртти.

у ливийәдики барлиқ тәрәпләрни вә хәлқаралиқ җәмийәтләрни, ливийәниң муқимлиқи үчүн вақитлиқ һөкүмәтни қоллашқа чақирди. у мундақ деди:

«йавропа иттипақи, бу даиридә, вақитлиқ һөкүмәтни бузмақчи болғанларға қарши ембарго вастисини қолида тутуп туруватқанлиқини хатирилитиду.»

у йавропа иттипақиниң ливийәни сайламға йәткүзидиған мусапини қоллашқа тәййар икәнликини билдүрүп: «йавропа иттипақи буниңдин башқа йәнә, уруш тохтитиш келишиминиң үнүмлүк иҗра қилинишини, б д т қорал ембаргосиға бойсунушни, барлиқ чәт әллик җәңчиләрниң вә йалланған әскәрләрниң б д т хәвпсизлик кеңишиниң қарари бойичә чекинишиниң муһимлиқини тәкитләйду. чәт әллик әскәрләрниң ливийәниң ишлириға арилишишини қобул қилғили болмайду.»



مۇناسىۋەتلىك خەۋەرلەر