b d t liwiyelik barliq tereplerni saylam netijisige hörmet qilishqa chaqirdi
birleshken döletler teshkilati bash katipi antonyo gutérésh liwiyede saylamlargha qeder yéngi ötkünchi hökümetning békitilishidin memnun ikenlikini bildürüp, liwiyelik barliq terepler we xelqaraliq aktiyorlarni saylam netijisige hörmet qilishqa chaqirdi.
türkiye awazi radiyosi xewiri: liwiyede ötkünchi hökümetning békitilishi üchün ötküzülgen saylamning tamamlinishi we netijilirining élan qilinishidin kéyin, birleshken döletler teshkilati bash merkizide axbarat élan qilish yighini ötküzgen gutérésh, ötkünchi hökümetning yéngi ezalirini tebriklidi.
bu basquchning liwiyediki barliq aktiyorlar teripidin qobul qilinghanliqini eskertken gutérésh, liwiye barliq terepler we xelqaraliq aktiyorlarni «ochuq – ashkara we keng dairilik» halda dawamlashturuluwatqan bu basquch hem saylam netijilirige hörmet qilishqa, liwiyede tinchliq ornitilishi üchün yéngi ötkünchi hökümet bilen hemkarliq ornitishqa chaqirdi.
birleshken döletler teshkilatining rehberlikide shiwétsariyening jenwe shehiride ötküzülgen saylamda, liwiye siyasiy diyalog munbiri ezalirining awaz bérishi netijiside, 2021 – yili 24 – dékabir küni ötküzülüshi pilanliniwatqan saylamlarghiche, pirézidént kéngishining reislikige muhemmed menfi, bash ministirliqigha abdulhamid dibeybe saylandi.
