dunyadiki döletler amérika yéngi hökümitini tebriklidi
amérikada 3-noyabir (2020) ötküzülgen saylamda ghelibe qilghan jo baydin we amérika tarixidiki tunji muawin pirézidént kaméla xaris qesem bérip wezipe tapshuruwalghandin kéyin, dunyaning her qaysi jayliridin tebrik télégrammiliri kélishke bashlidi.
türkiye awazi radiyosi xewiri: dunyadiki her qaysi döletler we xelqaraliq teshkilatlar amérikada pirézidéntliq hoquqini ötküzüwalghan jo baydin we muawin pirézidént kaméla xarisni tebriklidi.
yawropa ittipaqi kéngishining bashliqi charliz mishél (Charles Michel) tebrik télégrammisida: «téximu küchlük bolghan yawropa, téximu küchlük bolghan amérika we téximu küchlük bolghan dunya» qurushni teklip qildi.
u yawropa ittipaqining yéngi dewrde amérika bilen munasiwetliride aldin ehmiyet béridighan mesililerni, «köp tereplik hemkarliqlarni tereqqiy qildurush, wuxen wirusi (Kovid-19 ) gha qarshi turush, kilimat özgirishi, adil soda bilen iqtisadlarni qaytidin bina qilish, xewpsizlik we tinchliq üchün küchlerni birleshtürüsh» sheklide retke tizdi.
yawropa ittipaqi komitétining bashliqi ursula wondérléyén (Ursula von der Leyen) tiwittérda, baydin bilen xarisni tebriklidi we: «yawropa yipyéngi bashlanghuchqa teyyar» dédi.
nato bash katipi stolténbérg yazma bayanatida, ittipaq namidin baydin we uning muawini kaméla xarisni tebriklep: «bügün atlantik ittipaqi üchün yéngi dewrning bashlanghuchisi» dédi.
u: «pirézidént baydin bilen birlikte xizmet qilishni we özini bu yil (2021) biryusséldiki nato rehberler yighinida kütüwélishni töt köz bilen kütimen» dédi.
wénézuéla pirézidénti nikolas maduro baydigha xizmitide muweppeqiyet tilidi we amérika bilen diyalog ötküzüshke teyyar ikenliklirini eskertip: «amérika bilen özara hörmet we étirap qilishqa tayanghan yéngi bashlanghuchni bashlashni ümid qilimiz» dédi.
u baydindin wénézuélagha adil bolushni telep qildi.
yaponiye bash weziri suga yoshihidemu tiwittérda uchur hembehirlep, baydinni we uning muawini kaméla xarisni tebriklidi. u mundaq dédi:
«yaponiye bilen amérika bir-biridin mustehkem we dunyawi meniwi qimmet qarashlargha ige ikki ittipaqdash dölet. ittipaqdashliqimizni qollash, ‹erkin we ochuq bolghan hindi-atlantik› ni emelge ashurush üchün, sizni we xizmetdashliringiz bilen birlikte xizmet qilishni ümid qilimen» dédi.
iran tashqi ishlar ministiri muhemmed jewad zarif twittérda élan qilghan bayanatida, washingtondiki yéngi hökümetke, «rezillik ichide tarixning exlet sanduqigha tashliwétilgen» tramp hökümitining siyasetlirini qaytilimasliqni chaqiriq qildi.
hamasmu jo baydinni pelestin dewasini chiqiriwétish heriketlirige munasiwetlik qararlarni toxtitishqa chaqirdi. hamas bayanatchisi fewzi berhum baydinning, «pelestin xelqige qarshi xata we adaletsiz amérika siyasetlirining tarixiy yüzlinishi» ni tüzütüsh kéreklikini eskertti.
