amérikada dölet mejlisi binasigha hujum qilishni pilanlighan 3 kishi nazaretke élindi
amérikada ashqun ongchi guruppining 3 ezasi dölet mejlisi binasigha hujum qilishni pilanlighan, dep eyiblendi.
türkiye awazi radiyosi xewiri: fédératsiye tekshürüsh idarisi (FBI) ning bayanatida, «Oath Keepers» (qesem bergüchiler) namliq guruppining bashliqi 65 yashliq tomas édward kaldwéldin bashqa yene, jésika watkins we donowan ray krowl qatarliqlarning amérikigha qarshi pilan tüzüsh we 6-yanwarda dölet mejlisi binasigha hujum qilishni pilanlash bilen eyiblengenliki bildürüldi.
bayanatta gumandarlarning we bashqa guruppa ezelirining yézishqan uchurlirigha alahide orun ajritildi. dölet mejlisi binasigha hujum qilish jeryanida kaldwélgha ewetilgen uchurda «barliq ezalar paytextning astidiki tonillerde» déyilgenliki, yene bashqa uchurlarda bolsa, dölet mejlisi ezalirining «xain» dep teswirlengenliki we «kechlik ow» chaqiriqi élan qilinghanliqi qeyt qilindi.
amérikada dölet mejlisi binasi hujumigha chétishliq 125 kishi nazaretke élinghan idi.
amérika dölet mejlisi 6 – yanwarda pirézidéntliq saylimi saylighuchilar kéngishining bélet tashlishini testiqlash üchün ortaq yighin chaqirghan bolup, amérika pirézidénti tramp aqsaray aldida yighilish ötküzgen idi.
yighilishqa qatnashqan onminglighan namayishchilar namayishtin kéyin, dölet mejlisi binasigha qarap yürüsh qilghan we dölet mejlisi binasigha kirishke urunghan idi.
saqchilar bilen namayishchilar otturisida yüz bergen toqunushta, yüzligen namayishchilar tosaqlardin atlap ötüp, dölet mejlisi binasigha kirgen idi.
weqege mudaxile qilish üchün dölet mejlisi binasigha dölet muhapizetchiliri yollanghan we texminen 4 saetlik sürkilishtin kéyin bixeterlik qisimliri tertipni saqlighan idi.
weqede birsi saqchi, jemiy besh kishi qaza qilghan we onlighan kishi yarilanghan idi.