ئېفىيوپىيەدە نەچچە ئون پۇقرا قەتل قىلىنغاندىن كېيىن بەش نەپەر ھۆكۈمەت ئەمەلدارى قولغا ئېلىندى

تۈركىيە ئاۋازى رادىيوسى خەۋىرى: بېنىشاڭگۇل گۇمۇز ئۆلكىسى ئاخبارات ئىشلىرى ئىشخانىسىى يازما بايانات ئېلان قىلىپ، ھۇجۇم بىلەن ئالاقىسى بارلىقىدىن گۇمانلىنىپ نازارەت ئاستىغا ئېلىنغان كىشىلەرنىڭ ئۆلكىلىك ۋە فېدېراتسىيە ھۆكۈمەتلىرىنىڭ خىزمەتچىلىرى ئىكەنلىكىنى بىلدۈردى.

قوراللىق گۇرۇپپىلار ئېفىيوپىيەنىڭ غەربىي قىسمىغا جايلاشقان بېنىشاڭگۇل گۇمۇز ئۆلكىسىدىكى بىر يېزىغا ھۇجۇم قىلپ، نەچچە ئون پۇقرانى قەتل قىلغانىدى.

بەزى يەرلىك خەۋەر مەنبەلىرى، ھۇجۇمدا قازا قىلغان پۇقرالار سانىنىڭ 90 دىن ئارتۇق ئىكەنلىكىنى بىلدۈرگەنىدى.

ئېفىيوپىيە باش مىنىستىرى ئابى ئەھمەد ئالدىنقى كۈنى زىيارەت قىلغان مېتېكېلدا سۆز قىلىپ: «رايوندىكى مىللىي توقۇنۇش ۋە زوراۋانلىققا خاتىمە بېرىدىغانلىقى»نى ۋەدە قىلغانىدى.

ئېفىيوپىيە ھۆكۈمىتى، نەچچە ئون مىڭ كىشىنى يۇرت – ماكانىدىن مەھرۇم قىلغان ۋە يېقىنقى بىر قانچە ئايدىن بۇيان ئەۋج ئېلىپ كەتكەن توقۇنۇشلاردا دۆلەتنىڭ شىمالىدىكى تىگراي خەلق ئازادلىق فىرونتى ئىسيانچىلىرىنىڭ قولىنىڭ بارلىقىنى ئىلگىرى سۈرمەكتە.