jastin trédu xitayning bésimigha bash egmeydighanliqlirini bildürdi

türkiye awazi radiyosi xewiri: kanada bash ministiri jastin trédu «pul-muamile waqti géziti» (Financial Times) ning ziyaritini qobul qilip, ming wenjuning sotlinishini tosush urunushliri toghrisida toxtaldi.

u mejburlash diplomatiyelirige ishenmeydighanliqlirini tekitlep: «eslide bu xil bésimgha bash igishni bashlisingiz, uzun waqitta özingizni téximu nachar ehwalgha chüshüp qalghanliqingizni körisiz» dédi.

kanada bilen xitay otturisidiki diplomatik kirizis, 2018-yili 1-dékabir ming wenju amérikaning irangha qarshi yürgüzgen émbargolirigha xilapliq qilghanliqi sewebidin kanadaning wankowér ayrodurumida méksikagha uchush aldida qolgha élinishi bilen bashlanghan idi.

kanada sot mehkimisi wankowérda üch kün dawamlashqan sottin kéyin, ming wenjuni 10 milyon kanada dolliri kapalet bilen qoyup bérishke höküm qilghan idi.

xitay hökümiti ming wenju tutulghandin kéyin, kanadaliq sabiq diplomat mishél kowring (Michael Kovrig) bilen kanadaliq sodiger mishél spawor (Michael Spavor) ni dölet bixeterlikige tehdit sélish bilen eyiblep, qolgha alghan idi.

xitay hökümiti ashu künlerde, 2016-yili zeher etkeschiliki bilen eyiblinip 15 yil qamaqqa höküm qilinghan yene bir kanada puqrasi robért shéllénbérgni qaytidin sotlap, ölümge höküm qilghan idi.

xitay hökümiti oxshash sewebler bilen, kanadadin kanola (kanola) ösümlüki we gösh import qilishnimu toxtatqan idi.