yawropa ittipaqi ezerbeyjan-erméniye otturisida kélishim imzalanghanliqini tebriklidi
yawropa ittipaqi ezerbeyjan bilen erméniye otturisida taghliq qarabagh kirizisi toghrisida tüzülgen kélishimdin kéyin, urush toxtighanliqidin memnun ikenlikini bildürdi.
türkiye awazi radiyosi xewiri: yawropa ittipaqi komitétining bayanatchiliridin pétér stano (Peter Stano) kündilik axbarat élan qilish yighinida, ezerbeyjan bilen erméniye otturisida taghliq qarabagh heqqide urush toxtitilghanliqini körgenliklirini we urushning toxtighanliqidin memnun bolghanliqlirini éytti.
u ilgiri yawropa ittipaqining bu toghrida köp qétim chaqiriq élan qilghanliqini xatirilitip, bügüngiche nurghun kishining jénidin ayrilghanliqidin chongqur qayghurghanliqlirini qeyt qildi.
u mundaq dédi:
«hazir urush toxtitishning netijilirini téximu yaxshi chüshinish üchün, kélishim tepsilatlirini yéqindin közitimiz.»
iran pirézidéntliq ishxanisining mudiri mehmut waizi ezerbeyjan bilen erméniye otturisida hasil qilinghan urush toxtitishni memnunluq bilen qarshi alidighanliqlirini élan qildi.
mehmut waizi twittérda élan qilghan bayanatta: «iran ezerbeyjan bilen erméniye otturisida, qarabagh toghrisida rusiyening wastichiliq qilishi astida urush toxtitish kélishimi tüzülgenlikini memnunluq bilen qarshi alidu» dédi.
u téhran hökümitining, ikki döletning özara xelqaraliq chégralirini we puqralirining heq-hoquqlirini qoghdash pirinsipi asasida, bu kirizisni muzakire we siyasiy yollar bilen hel qilalaydighanliqigha ishinidighanliqini we urushning axirlashqanliqidin memnun ikenlikini bildürüp, urush toxtitishning ijra qilinishini ümid qilidighanliqini tekitlidi.
hamas bayanatchisi sami ebu zuhri twittérda: «ezerbeyjanning urush bilen qolgha keltürgen ghelibisini we zéminlirini qayturuwalghanliqini tebrikleymiz. bu barliq ishghaliyetlerning tebiiy aqiwitidur» dédi.
u ezerbeyjan xelqining muqimliqqa we parawanliqqa érishishini ümid qilidighanliqlirini eskertip, türkiyening ezerbeyjanning «adaletlik kürishini qollighanliqi» ni teqdirleydighanliqlirini tekitlidi.
