nato: türkiye bilen girétsiye birleshme herbiy manéwirni bikar qildi

shimaliy atlantik ehdi teshkilati bash katipi stolténbérg türkiye bilen girétsiyening kéler hepte sherqiy aqdéngizda ötküzülidighan birleshme herbiy manéwirlarni bikar qilghanliqini bildürdi.

1515070
nato: türkiye bilen girétsiye birleshme herbiy manéwirni bikar qildi

türkiye awazi radiyosi xewiri: stolténbérg, shimaliy atlantik ehdi teshkilati dölet mudapie ministirliri yighinidin kéyin élan qilghan bayanatida, sherqiy aqdéngizning weziyitige alaqidar bir soalgha jawab bergende mundaq dédi: «türkiye bilen girétsiye, aldimizdiki hepte her ikki döletning milliy bayramliri tebriklinidighanliqi üchün, kéler hepte ötküzülüshi pilanlanghan birleshme herbiy manéwirlarni bikar qildi. bu qarardin intayin xursenmen.»

türkiyening ijabiy we soghuqqan pozitsiye tutuwatqanliqini eskertken stolténbérg, mundaq dep körsetti: «bu, köngülsiz weqeler we qazalarning aldini élish yolida tashlanghan muhim qedemlerdur. bizmu buni chöridigen halda, gérmaniyening izdinish söhbetlirining bashlinishi üchün körsitiwatqan tirishchanliqlirining dairisini kéngeyteleydighanliqimizni ümid qilimen.»

xewpsizlik menbelirining bildürüshiche, birleshme herbiy manéwirlar, türkiyening teklipige asasen bikar qilghan bolup, türkiye, saqliniwatqan mesililerni diyalog we inaq qoshnidarchiliq munasiwetliri dairiside hel qilish éngigha asasen shundaq teklip sunghan.

türkiye dölet mudapie ministiri xulusi aqar, sherqiy aqdéngizda ötküzülidighan birleshme herbiy manéwirlarning bikar qilinishi heqqide bergen bayanatida, mundaq dégen: «xizmetdashlirimiz bu heqte xizmet ishlewatidu, aldimizdiki künlerde ularning xizmetlirining tamamlinishini kütüwatimiz.»



مۇناسىۋەتلىك خەۋەرلەر