b d t omumiy kéngishining bashliqi niyu york sheher bashliqini tenqid qildi

türkiye awazi radiyosi xewiri: amérika qoshma ishtatliri niyu york sheher bashliqi bil dé bilasyo, birleshken döletler teshkilati omumiy kéngishining bashliqi wolqan bozqirning, «wuxen wirusi» gha qarshi küreshte birleshken döletler teshkilati bilen sahibxan sheher niyu york otturisida hemkarliq mesiliside körüshüsh telipiini ret qildi.

wolqan bozqir, bu heqte élan qilghan bayanatida mundaq dédi: «niyu york sheher bashliqi bilen körüshüshni telep qildim. chünki <wuxen wirusi> yuqumi yuqiri derijilik rehberler ara uchur - alaqe ornitishni teqezza qilmaqta. 193 döletning wekilliri we herqaysi sheherlerning siyasiy rehberliri ara diyalog we maslashturush xizmitini ishqa kirishtürüsh zörür dep qaraymen. mana mushundaq sharaitta, niyu york sheher bashliqining körüshüsh telipimni ret qilishidin tolimu epsuslinimen.»

niyu york shehirining siyasetlirining birleshken döletler teshkilatining paaliyetliri we pütkül dunyadiki milyonlarche kishining kündilik hayatigha biwasite tesir körsitidighan bolushigha qarimay, birleshken döletler teshkilati bilen niyu york shehiri otturisidiki uchur – alaqining kemchillikidin endishe qiliwatqanliqini eskertken bozqir, mundaq dep körsetti: «birleshken döletler teshkilatining, omumiy kéngeshning bashliqining we bu wezipini bir türkning öz üstige élishining ehmiyiti nahayiti zor. bulargha hörmet qilinishini kütüwatimiz.»

niyu york sheherlik hökümiti xelqara munasiwetler komissari pénniy abéywardéna, wolqan bozqirning tenqidige qarita élan qilghan bayanatida, niyu york sheher bashliqi bil dé bilasyoning birleshken döletler teshkilati bash katipi antonyo gutérésh bilen nahayiti yaxshi munasiwiti barliqini we wolqan bozqirdin burunqi birleshken döletler teshkilati omumiy kéngishining bashliqliri bilenmu chongqur hemkarliq ornatqanliqini eskertip mundaq dédi: « birleshken döletler teshkilatining yéngidin saylanghan 75-nöwetlik omumiy kéngishining bashliqi wolqan bozqirning bügünki bayanatidin heyran qalduq we epsuslanduq.»

u yene, niyu york sheher bashliqi bil dé bilasyoning yéqinqi 7 yildin buyan birleshken döletler teshkilati we niyu york shehiri otturisidiki hemkarliqni kücheytish üchün tirishchanliq körsitiwatqanliqinimu ilgiri sürdi.