ruhani qoshna döletlerning zémin pütünlükining muhimliqini tekitlidi

türkiye awazi radiyosi xewiri: iran pirézidéntliq mehkimisi ezerbeyjan-erméniye toqunushi toghrisida bayanat élan qildi.

 bayanatta bildürülishiche, hesen ruhani bilen ezerbeyjan pirézidénti ilham eliyéw téléfonda körüshken. körüshüshte taghliq qarabaghdiki toqunushlar muhakime qilinghan.

hesen ruhani iran xelqining ezerbeyjan bilen yéqin tarixiy, medeniyet we diniy munasiwetlirining barliqini bildürüp: «her daim iran we ezerbeyjan xelqliri bilen hökümetlirining yaxshi munasiwetliri boldi. iran mesulliri yéqinqi talash-tartishliri bilen, ezerbeyjan-erméniye toqunushi toghrisida nahayiti ochuq we éniq meydanini namayan qildi» dédi.

u ezerbeyjan bilen erméniye otturisidiki toqunushqa bashqa döletlerning arilishishining, toqunushlarni rayonluq urushqa aylanduruwétish xetiridin bésharet bérip: «rayonning, bolupmu shimaliy chégralarning xatirjemliki, bixeterliki we muqimliqi biz üchün intayin muhim. bu ixtilaplar we chégralardiki bixeter bolmighan muhit térrorluq guruppilirining bash kötürüshi üchün paydiliq sharait peyda qilmasliqi kérek. rayonda tinchliq mesilisi intayin muhim. biz üchün qoshnilarning zémin pütünlüki intayin muhim ehmiyetke ige» dédi.

u chégralardiki toqunushlarning sheher urushigha aylinip kétishidin endishe qilidighanliqlirini eskertti. u mundaq dédi:

«bu urush we toqunushlarning sheher urushliri bilen netijilenmeslikini ümid qilimen. bundaq bolsa, xelq yurt-makanliridin köchüshke mejbur bolidu. puqralar janliridin ayrilidu. bu kishini intayin qayghulanduridu, bu intayin xeterlik.»

toqunushlarning eng qisqa waqit ichide axirlishishini chaqiriq qilghan hesen ruhani: «iran baku bilen yériwan otturisidiki ixtilaplarning xelqaraliq qanun we ikki döletning resmiy étirap qilinghan chégraliri ramkisida hel qilinishi üchün türlük qedemlerni tashlashqa teyyar» dédi.

u yene, iranning erméniye we ezerbeyjan chégralirining qoghdilishi, iran yéziliridiki xelqlerning jan bixeterliki toghrisida ikki döletni agahlandurdi.

ezerbeyjan pirézidénti ilham eliyéw: «iran resmiy organlirining ijabiy pozitsiyesige, zémin pütünlükini tekitligenlikige we qarabagh ixtilaplirini hel qilish üchün körsetken tirishchanliqlirigha teshekkür éytimen» dédi.

u chégralarda térrorist guruppilarning bash kötürüsh xetiri üstide toxtilip, mundaq dédi:

«iranning bixeterliki ezerbeyjanning bixeterliki hésablinidu. bu ixtilaplarning qoshna döletlerning bixeterlikige ziyan sélishigha ruxset qilmaymiz.»