kristchérch shehiridiki jamelerge hujum qilghan qatil sotlinishqa bashlidi

türkiye awazi radiyosi xewiri: «radiyo yéngi zélandiye» yéngi zélandiyening kristchérch shehiridiki ikki jamege qoralliq hujum qilip 51 kishini öltürgen we 49 kishini yarilandurghan térrorist brénton tarrantning sotlinishqa bashlighanliqini xewer qildi.

xewerde bildürülishiche, térrorist tarrantqa bérilidighan jaza békitilidighan kristchérch aliy sotida töt kün dawamlishidighanliqi perez qiliniwatqan sotlashning birinchi küni, qattiq bixeterlik tedbirliri astida bashlanghan.

sotqa térrorluq hujumida jénidin ayrilghanlarning aililiridin bashqa, hujumda yarilanghanlarmu qatnashti. bu jeryanda, sot mehkimisige tutishidighan yollarda qatnash toxtitildi. yol etrapidiki öylerning ögzilirige saqchilar orunlashturuldi.

kristchérch aliy sotining sotchisi kaméron mandér (Cameron Mander) bashchiliq qildighan sotqa, brénton tarrant tutup turuluwatqan aklend (Auckland) türmiside kaméra arqiliq qatnashturulidu.

özini aqlash telipi 2020-yili 13-iyulda kristchérch aliy soti teripidin qobul qilinghan térrorist tarrant, özi heqqidiki 51 qatilliq, 40 qétim adem öltürüshke urunush we bir qétimliq térrorluq hujumi qatarliq eyibleshlerni qobul qilghan idi.

aqtenliklerni «hemmidin ela» dep qaraydighan ashqun ongchi térroistning töt künlük sottin kéyin, ömürwayetlik qamaq jazasigha höküm qilinidighanliqi texmin qilinmaqta.

tarrant 2019-yili 15-mart kristchérch shehiridiki nur we linwud jamesige jüme namizi oquluwatqan waqitta aptomatik qoral bilen hujum qilghan idi. hujumda 51 kishi jénidin ayrilip, 49 kishi yarilanghan idi.