hesen nesrullah béyruttiki partlash toghrisida téléwiziye nutuqi sözlidi
liwan hizbullahi bash katipi hesen nesrullah, béyrut portida özlirining qoral ambarlirining yoqluqini, tekshürüsh netijiside bu heqiqetning ottirigha chiqidighanliqini éytti.
türkiye awazi radiyosi xewiri: hesen nesrullah qollighuchilirigha qarita téléwiziye nutuqi sözlep, seyshenbe küni béyrut portida yüz bergen shiddetlik partlash heqqidiki özlirige qaritilghan eyibleshlerge jawab berdi.
bezilerning hizbullahni béyrut portidiki partlashning jawabkari dep körsetkenlikini we buninggha delil qilip portning teshkilatning kontrolluqida ikenlikini ilgiri sürgenlikini tilgha alghan nesrullah, «bu bir yalghan, béyrut portini biz kontrol qilmaymiz, uyerde néme barliqini bilmeymiz» dédi.
mehelliy we ereb taratquliri bilen bir qisim siyasiy küchlerning perezlerge tayinip höküm chiqarghanliqini bildürgen nesrullah, «bular béyrut portida yüz bergen partlashning hizbullahning bashqurulidighan bombisi yaki qoral-yaragh iskilatidin kélip chiqqanliqini otturigha qoydi. dairiler portta qoral yoqluqini we partlatquch maddining ammoniy nitrat ikenlikini jakarlishidin kéyin bolsa, mezkur maddilarning bizge tewe ikenlikini éytip, eyibleshlirini dawamlashturdi» dédi.
nesrullah, bu weqening adil we ochuq – ashkara tekshürülüshini telep qilip, «eger liwan döliti bu mesilide netijige érishelmise, biz choqum siyasiy bashqurush apparatliri we dölet organliridin ümid üzüshimiz kérek» dégenlerni qeyt qildi.
nesrullah mezkur partlashning «özlükidin yüz bergen bir ot apiti yaki bir buzghunchiliq netijiside» meydangha kelgenliki éhtimalliqining nezerde tutulushi kéreklikini eskertti.
8-ayning 4- küni béyrut portidiki partlatquch dora qoyulghan 12-nomurluq iskilatta deslipide ot apiti yüz bergen, arqidin nahayiti küchlük partlash yüz bérip, pütün béyrutni zilzilige keltürgenidi. partlashta 154 ademning hayatidin ayrilghanliqi, texminen 5 ming ademning yarilanghanliqi bildürülgenidi.
liwan pirézidénti mishel ewn, bu qétimliq partlashni 6 yildin buyan béyrut portida saqliniwatqan 2750 tonna éghirliqidiki ammoniy nitratning keltürüp chiqarghanliqini éytqan, partlash xususiyitige ige 2750 tonna ammoniy nitratning néme üchün 6 yil boyiche portta saqlanghanliqi alaqidar tereplerning qiziqishini qozghanidi.
