dunya elliri liwandiki partlash toghrisida arqa - arqidin bayanat élan qildi

dunya jamaetchiliki liwanning paytexti béyrutta yüz bergen partlash munasiwiti bilen arqa - arqidin bayanatlarni élan qildi...

1467644
dunya elliri liwandiki partlash toghrisida arqa - arqidin bayanat élan qildi

türkiye awazi radiyosi xewiri: birleshken döletler teshkilati, liwanning paytexti béyrutta yüz bérip 100 ademning qaza qilishini keltürüp chiqarghan weqe munasiwiti bilen, weqede qaza qilghanlarning aile-tawabiatliri, liwan hökümiti we xelqidin hal soridi.

b d t bash katipining bayanatchisi ferhan heq yazma bayanat élan qilip, «bash katip antonio gutérrés béyruttiki dehshetlik partlashta qaza qilghanlarning aile- tawabiatlirigha, liwan hökümiti we xelqige chongqur teziye bildürdi» dégenlerni qeyt qildi.

gutérrésning partlashta yarilanghanlargha téz shipaliq tileydighanliqini bildürgen heq, weqede béyrutta ishlewatqan b d t xadimliriningmu yarilanghanliqini bayan qildi.

ferhan heq, «b d t mushundaq qiyin waqitta liwanni qollaydighanliqi heqqide wede béridu hemde liwanning bu weqege taqabil turushigha aktip yardem béridu» dédi.

yawropa ittipaqi kéngishining reisi charliz michél özining ijtimaiy alaqe adrésida bayanat bérip, yawropaning liwan xelqining yénida turup yardem bérishke teyyar ikenlikini eskertti we liwan xelqini «küchlük turush» qa chaqirdi.

yawropa ittipaqi komitétining puqralarni qoghdash we insanperwerlik mesilisige mesul ezasi janiz lénarchich, béyruttiki partlashta qaza qilghanlarning aile- tawabiatliridin hal soridi.

amérika pirézidénti donald trampmu aqsarayda ötküzgen muxbirlarni kütüwélish yighinini liwanda yüz bergen weqe üstide toxtilish bilen bashlap, «biz bu yerde yardem qilishqa teyyar turuwatimiz, qarimaqqa bir qorqunchluq bir hujumdek qilidu» dédi.

tramp bir muxbirning bu weqeni némishqa «hujum» dep atighanliqi toghrisidiki soaligha, «men bir qisim génirallirimiz bilen paranglashtim, ular buni hujum dep oylawatqandek qilidu, bu bir xil ishlepchiqirish jeryanidiki partlash emes» dep jawab berdi.

amérika tashqi ishlar ministiri mayk pompéyomu béyrutta yüz bergen partlashta hayatidin ayrilghanlargha teziye bildürdi we amérikining liwan xelqige yardem bérishke teyyar ikenlikini éytti.

u, liwan hökümitining bu weqeni tekshürüwatqanliqini, tekshürüshning netijisini taqetsizlik bilen kütüwatqanliqini bildürdi.

firansiye pirézidénti émmanuél makron ijtimaiy alaqe torida bayanat bérip, « béyrutta nurghun ademning ölümini keltürüp chiqarghan we sheherge éghir ziyan yetküzgen partlashtin kéyin liwanliqlargha qérindash hemkarliqini namayan qilimen» dédi.

engliye bash weziri boris jonson tiwittér arqiliq bayanat bérip, «béyruttin kelgen süret we sin körünüshliri kishini heyran qalduridu, méning barliq oy- xiyallirim we dualirim partlashning tesirige uchrighanlar bilen birge, biz qolimizdin kelgen barliq yardemlerni bérishke teyyarmiz» dédi.

bélgiye tashqi ishlar ministiri filippin goffin tiwittérdiki uchurida, «béyruttiki partlash peyda qilghan ziyan nahayiti éghir. bizning elchixana binamiz talapetke uchridi. ikki xizmetdishimiz we ularning aile- tawabiatliri eynek sunuqliri sewebidin yénik yarilandi, biz bu rayondiki bélgiyeliklerge yardem bérishke teyyarmiz» dégenlerni qeyt qildi.

awstriye pirézidénti aléksandér wan dér béllén özining ijtimaiy alaqe hésabatida partlash munasiwiti bilen teziye uchuri hembehirlep, «bizning oy - xiyalimiz liwan xelqi, yarilanghanlar we hayatidin ayrilghanlarning aile- tawabiatliri bilen birge» dédi.

girétsiye tashqi ishlar ministirliqi liwan hökümiti we xelqige yar – yölek bolidighanliqini bildürdi we atina hökümitining bu döletke her qandaq yardemni bérishke teyyar ikenlikini jakarlidi.

shimaliy qibris türk jumhuriyiti bash ministiri ersin tatar liwanning paytexti béyrutta yüz bergen partlash munasiwiti bilen teziye télégrammisi tarqatti.

ersin tatar özining tiwittérdiki hésabatida uchur hembehirlep, «liwandiki béyrut portida yüz bergen keng kölemlik partlash weqesi we minglarche kishining yarilinishidin biz qattiq biaram bolduq. men özüm we hökümitimge wakaliten liwan xelqige teziye bildürimen, qaza qilghanlargha allahtin rehmet, yarilanghanlargha téz shipaliq tileymen» dédi.

liwiye döletlik aliy kéngishining reisi xalid el mishri, liwanning paytexti béyrutta yüz bergen partlashta hayatidin ayrilghanlargha teziye bildürdi.

iraq bash ministiri mustafa elkazimi yazma bayanat élan qilip, iraq hökümiti we xelqining liwan hökümiti we béyrutni zerbe obyékti qilghan qanliq hujumda liwanliqlar bilen bir septe turidighanliqini eskertti.

misir pirézidénti abdulfettah sisi, partlashta hayatidin ayrilghanlarning tughqanlirigha teziye bildürdi we sewr tilidi.

iran pirézidénti hesen ruhani, liwanning paytexti béyrutta yüz bergen partlashta hayatidin ayrilghanlargha teziye bildürdi؛ u, liwan pirézidéntigha qaritip sözligen teziye sözide, dölitining liwangha her xil sehiye yardimi bérishke teyyar ikenlikini, bu weqening barliq tepsilatlirining derhal ashkarilinip, sheherning tinch bolushini ümid qilidighanliqini bildürdi.

iran tashqi ishlar ministiri muhemmed jewad zerif tiwittér adrésida hembehriligen «chin qelbimdin béyrutluqlargha salam» dégen xet yézilghan bir parche foto – süretning astidiki uchurida, dölitining liwangha her jehettin yardem qilishqa teyyar ikenlikini qeyt qildi.

iyordaniye tashqi ishlar ministiri eymen sefedimu bu heqte bayanat bérip, dölitining liwangha her xil yardemlerni ewetishke teyyar ikenlikini éytti.

israiliye béyruttiki partlashtin kéyin liwangha yardem bérishni xalaydighanliqini melum qildi.

pelestin pirézidénti mehmud abbas, béyruttiki partlashta qaza qilghan liwanliqlar üchün dölette matem élan qildi. bu qarar bilen dölet miqyasidiki barliq bayraqlar yérim chüshürüldi. abbas yene liwan pirézidénti mishél ewn bilen téléfonliship, partlashta hayatidin ayrilghanlargha teziye bildürdi.


خەتكۈچ: #liwan , #béyrut

مۇناسىۋەتلىك خەۋەرلەر