bélgiye padishahi filip dölitining mustemlikichilik ötmüshidin azablinidighanliqini éytti
bélgiye padishahi filip dölitining mustemlikichilik ötmüshidin «chongqur qayghu» hés qilghanliqini élan qildi.
türkiye awazi radiyosi xewiri: bélgiyede chiqidighan yuqiri trajliq fransozche «Le Soir» gézitining xewer qilishiche, padishah filip kongo démokratik jumhuriyiti musteqilliqining 60 – yilliqini tebriklesh munasiwiti bilen pirézidént féliks tshésékédigha mektup yollighan.
padishah filip mektupta hazirqi ikki dölet munasiwitini téximu tereqqiy qildurush üchün «ötmüsh» ni sözlishishning lazimliqini tekitligen.
padishah filip kongo démokratik jumhuriyiti bilen bélgiyening tarixi ötmüshidiki utuqlirining «azabliq» dewrlernimu öz ichige alidighanliqini bildürüp, «ötmüshtiki ortaq eslimimizde saqliniwatqan bezi zorawanliq weqeliri bilen birge, zulumgha shahitliqlarmu bar» dédi.
padishah filip: «men ötmüshte yü bergen azab-oqubetlerge bolghan chongqur qayghu-hesretlirimni bildürüshni xalaymen» dédi.
padishah özining her xil irqchiliqqa qarshi turidighanliqini tekitlep, bélgiye parlaméntining mustemlikichilik ötmüshini tetqiq qilish xizmitini qollighanliqini qeyt qildi.
gerche padishah filip mektubida kechürüm sorimighan bolsimu, emma bélgiye padishah jemetidin dölitining kongodiki mustemlikichilik ötmüshi heqqide bayanat élan qilghan tunji padishahqa aylandi.
bélgiyening kongodiki mustemlike ötmüshining simwoli bolghan padishah 2- léopold özining mal-mülki dep élan qilghan kongoni qanchilighan yillarghiche bulang-talang qilip, milyonlighan insanning öltürülishige seweb bolghan qatilarche qilmishliri bilen waqitning ötüshige egiship «kongo qassapi» dep nam alghan idi.
kongo 1960-yili bélgiyedin musteqil bolup, kongo démokratik jumhuriyitige aylanghan idi.
