tramp, jon boltonning uyghurlar we bashqa mesililer toghrisidiki eyibleshlirini ret qildi

türkiye awazi radiyosi xewiri: amérika pirézidénti donald tramp, sabiq dölet xewpsizlik ishliri meslihetchisi jon boltonning, trampning «2020 saylamlirida xitayning yardimige (érishishning yolini) izdewatqanliqi we béyjingning siyasetlirini qollaydighanliqi» toghrisidiki dewalirini ret qildi.

donald tramp, boltonning mushu ayning axirida élan qilinishi pilanliniwatqan «u ishlar yüz bergen öy: aqsaray eslimisi» namliq kitabining taratqulargha ashkarilinip ketken bölümliride, özining (trampning) xitay we bashqa döletlerge munasiwetlik siyasetliri toghrisida her xil eyibleshlerni ilgiri sürgenliki otturigha chiqqandin kéyin bayanat élan qildi.

foks qanilidin séan hannityning pirogrammisigha téléfon qilghan tramp, boltonning dewalirigha jawaben «bügüngiche héchbir amérika pirézidénti xitay we rusiyege menchilik qattiq muamile qilip baqmidi» dédi.

donald tramp, dölet xewpsizlik ishliri meslihetchilikige teyinlesh arqiliq boltongha bir purset yaritip bergenlikini eskertip, «bolton bu kitabni yézish arqiliq qanungha qarshi chiqti. bular intayin mexpiy uchurlar idi we (u) bularni ashkarilidi» dédi.

boltonning kitabida ilgiri sürülgen qarashlar toghrisida «wal sitrit jurnal»ning soallirigha jawab bergen tramp, xitaygha qarshi tashqi siyasitini aqlap, uyghurlar mesiliside xitayni qollaydighanliqi heqqidiki dewalarni ret qildi.

u, boltonning, trampning uyghur rayonidiki yighiwélish lagérliri mesiliside xitay dölet reisi shi jinpingni qollaydighanliqi heqqidiki dewasigha «bu toghra emes» dep qarshi chiqti we  bu mesilide xitaygha émbargo yürgüzülüshi üchün bir qanunni testiqlighanliqini xatirilitip ötti.

u, «bolton bir yalghanchi. aqsaraydiki hemmeylen uningdin nepretlinidu. xususen men uni sarang dep oylidim» dégenlerni sözlirige ilawe qildi.