гутеррес: дунйада йатларни, йәһудийларни, мусулманларни йаман көрүш хаһиши еғирлишиватиду

түркийә авази радийоси хәвири: бирләшкән дөләтләр тәшкилати (б д т) баш катипи антонио гутеррес, вухән вируси (ковид – 19) инсанларни айрип олтурмиған болсиму, һәрқайси хәлқләр оттурисидики өчмәнлик қарашлири вә йатларни йаман көрүш хаһишиниң күчийип кәткәнликини ейтип агаһландурди.

баш катип антонио гутеррес син көрүнүшлүк учур тарқитип, «ковид – 19 кимликиңизгә, қәйәрдә йашайдиғанлиқиңизға вә немигә етиқад қилидиғанлиқиңизға қаримайватиду, бирақ өчмәнлик, йатларни йаман көрүш, нуқсанларни шуларға дөңгәп қойуш вә вәһимә йаритиш деңиз ташқини мисали кеңийишни давамлаштурмақта» деди.

вухән вируси сәвәбидин интернет муһитлирида вә кочиларда чәт әлликләрни йаман көрүшниң, йәһудий өчмәнлики суйиқәст нәзәрийәлириниң вә мусулманларға һуҗум қилиш әһваллириниң күчийип кәткәнликини билдүргән гутеррес, көчмән вә мусапирларға болса, вирусниң мәнбәсидәкла муамилә қилиниватқанлиқини, уларниң давалаштин мәһрум қалдурулғанлиқини ейтти.

мухбирлар, сәһийә хадимлири вә кишилик һоқуқ паалийәтчилириниң болса, һуҗум обйекти қилинғанлиқини әскәрткән гутеррес, «нәпрәт вирусиға қарита һәрқайси җәмийәтләрниң иммунетит системисини күчәйтишимиз керәк» деди.

сийасәтчиләр вә лидерларни җәмийәтниң барлиқ қатламлири билән һәмкарлишишқа чақирған баш катип гутеррес, иҗтимаий таратқу ширкәтлирини болса, айаллар өчмәнлики вә башқа зийанлиқ мәзмунларни интернет муһитидин чиқирип ташлашқа чақирди.