b d t: 36 dölette acharchiliq bash kötürüshi mumkin

türkiye awazi radiyosi xewiri: birleshken döletler teshkilati dunya ashliq pilan mehkimisining mudiri déywid biasléy, dunyaning nöwette peqet wuxen wirusi (kowid – 19) yuqumighila emes, «acharchiliq yuqumi»ghimu duch kéliwatqanliqi toghrisida agahlandurup, eng nachar sénariyege asaslanghanda, 36 dölette acharchiliq yüz bérish éhtimalining barliqini éytti.

déywid biasléy, b d t xewpsizlik kéngishining téléwiziye yighinida, urushlar we qoralliq toqunushlar peyda qilghan acharchiliqning puqralargha körsitidighan tesiri heqqide uchur berdi.

u, kowid – 19 yuqumi bashlinishtin burun, 2020 – yilida ikkinchi dunya urushidin buyanqi eng éghir insaniy kirizisning yüz béridighanliqi toghrisida agahlandurghanliqini xatirilitip, «nöwette peqet kowid – 19 yuqumila emes, acharchiliq apitigimu duch kéliwatimiz» dédi.

déywid biasléy, yemen, süriye we jenubiy sudandiki urushlardin bashqa, sherqiy afriqadiki chéketke apiti, tebiiy apetler we kilimat özgirishi peyda qilghan ehwallarni tilgha élip, «bügün kowid – 19 yüzidin peqet bir dunyawi yuqumluq késellikkila emes, shuning bilen bir waqitta, dunyawi insaniy kirizisqimu duch kéliwatimiz» dégenlerni qeyt qildi.

urush rayonliridiki milyonlighan kishilerning künséri acharchiliq girdabigha ittiriliwatqanliqini tekitligen biasléy, «her küni kechte 821 milyon adem ach uxlap qalmaqta we asta xaraktérlik achliqning azabini chekmekte» dédi.